PËRBALLJA PËR HISTORINË! Arsenal - PSG për finalen e Champions
Nga OraNews Përditësimi i fundit 28 Prill 2025, 15:02
Arsenal dhe PSG do të zbresin në fushë me formacion të plotë të martën. Në përballjen që do vendosë për finalistin e parë të Champions pritet që ekipet të luajnë në sulm për ti lënë shumë pak ndeshjes së kthimit
Arsenali ëndërron të rikthehet në finalen e Ligës së Kampionëve për herë të parë që nga viti 2006, teksa përballet me Paris Saint-Germainin në gjysmëfinale.
Të dy skuadrat janë përballur këtë sezon, me "Topçinjtë" që fituan 2-0 në tetor, por PSG ka shfaqur përmirësime të dukshme që prej asaj kohe.
Skuadra e Luis Enrique-s, që do të luajë ndeshjen e dytë në "Parc des Princes", shpreson të përmbysë rezultatin, ndërsa Arsenali vjen i karikuar nga eliminimi i Real Madridit në çerekfinale dhe sheh realisht mundësinë për të siguruar një biletë për finalen e Mynihut më 31 maj.
PSG ka pësuar 38% të golave nga situatat e topave të ndalur këtë sezon, një dobësi që Arsenali mund ta shfrytëzojë. Kjo u pa edhe në humbjen 3-1 të PSG ndaj Nicës, ku Youssouf Ndayishimiye shënoi pas një goditjeje të lirë. Kapiteni Marquinhos pranoi se ekipi duhet të ketë strategji të posaçme për t’i ndalur këto kërcënime.
Luis Enrique e ka cilësuar më herët Arsenalin si “skuadra më e mirë e Europës pa topin”, dhe ndeshja e parë e këtij sezoni e konfirmoi këtë. "Topçinjtë" dominuan në duele fizike, ndërhyrje dhe rikuperime topi, me Declan Rice dhe mesfushorët e tjerë që fituan betejën në qendër. Prania e Mikel Merino-s mund të jetë vendimtare për të ruajtur këtë avantazh fizik.
Një nga përballjet më interesante pritet të jetë ajo mes Bukayo Saka dhe mbrojtësit të majtë të PSG, Nuno Mendes. Pas rikuperimit nga dëmtimi në dhjetor, Saka po rifiton formën e tij më të mirë dhe ishte ndër heronjtë në triumfin ndaj Real Madridit. Në ndeshjen e tetorit, 44% e sulmeve të Arsenalit u zhvilluan nga krahu i tij, dhe Arteta do të kërkojë sërish ta vendosë Saka-n në qendër të lojës ofensive.
