Rrëmbimi dhe zhdukja e Jan Prengës/ Dritan Rexhepi nuk pranon të dëshmojë në gjyqin ndaj Altin Hajrit
Nga OraNews Përditësimi i fundit 18 Prill 2025, 13:25
Dritan Rexhepi ka shfrytëzuar të drejtën e tij ligjore për të mos dëshmuar në procesin gjyqësor ndaj Altin Hajrit, që po zhvillohet në Gjykatën e Posaçme kundër Korrupsionit dhe Krimit të Organizuar.
Hajri po gjykohet në mungesë për rrëmbimin dhe zhdukjen e Jan Prengës, një ngjarje e rëndë që tronditi opinionin publik.
Rexhepi, i cili është i përfshirë në një proces paralel për të njëjtën ngjarje, u paraqit në sallën e gjyqit si i bashkëpandehur në një çështje të lidhur.
I pyetur nga trupi gjykues nëse pranon të japë dëshmi, ai zgjodhi të mos dëshmojë.
Në të njëjtën linjë qëndroi edhe Aldo Majnishta, një tjetër i pandehur për këtë çështje, i cili gjithashtu refuzoi të dëshmojë.
Për shkak të mungesës së dëshmive dhe të disa personave të thirrur, seanca u shty për në datën 12 maj, kur pritet të përsëriten thirrjet për familjarët e Jan Prengës, të cilët ndodhen jashtë Shqipërisë.
Gjykata synon të sigurojë dëshmitë e tyre si pjesë e procesit hetimor.
