PAMJET+DETAJET nga at*ntati në Tiranë/ Mes 4 të pl*gosurve djali dhe nipi i pronarit të një kompanie “Security”. Gjendet "G-Class" me shenja...
Nga OraNews Përditësimi i fundit 18 Prill 2025, 07:14
Detaje të reja janë zbardhur nga atentati i mbrëmjes së sotme në Tiranë, ku një automjet është qëlluar me armë zjarri teksa ishte në lëvizje dhe për pasojë mbetën të plagosur 4 persona.
Sipas informacioneve paraprake, autorët kanë ndjekur mjetin nga rrethrrotullimi i Shkozës dhe kanë hapur zjarr në drejtim të tij gjatë ndjekjes përgjatë Unazës së Madhe.
Mësohet se automjeti që u qëllua, tip G Class është gjetur në Lundër me shenja plumbash.
Menjëherë pas sulmit, autorët dyshohet se janë larguar me shpejtësi duke humbur gjurmët.
Nga atentati dyshohet se janë plagosur katër persona. Burime nga Spitali i Traumës bëjnë me dije se kanë mbërritur të plagosur me armë zjarri shtetasit Arens Stafa, 34 vjeç, dhe Marko Bardhi Demiraj, 17 vjeç, të cilët janë dëmtuar në dorë dhe krahë.
Gjithashtu, në sallën e operacionit janë futur Dior Demiraj, 11 vjeç, dhe Kian Mullaj, 19 vjeç.
Çfarë tha Policia
Policia e Tiranës më herët informoi se më datë 17.04.2025, rreth orës 21:50, në spitalin e Traumës, kanë shkuar dyshohet të plagosur me armë zjarri në Lundër, shtetasit A. S., 34 vjeç, K. M., 19 vjeç, dhe dy të mitur të moshës rreth 11 vjeç dhe 17 vjeç.
Policia tha se është ngritur grupi hetimor dhe nën drejtimin e Prokurorisë vijon puna intensive për zbardhjen e rrethanave të ngjarjes, sekuestrimin e provave që do të shërbejnë për zbardhjen e ngjarjes, identifikimin dhe kapjen e autorëve.
