Shpërthim i sëmundjes Afta Epizootike në Hungari: Mijëra kafshë do të groposen pranë kufirit me Austrinë
Nga OraNews Përditësimi i fundit 1 Prill 2025, 20:08
Në qytetin Levél të Hungarisë, mbi 3,000 kafshë të fermës do të therën dhe varrosen pas shpërthimit të sëmundjes Afta Epizootike.
Kamionët po transportojnë kufomat e kafshëve në një zonë shtetërore midis fshatrave Csemeztanya dhe Irénpuszta, afër kufirit hungarez-austriak, ku ato do të varrosen për të parandaluar përhapjen e sëmundjes.
Sëmundja është zbuluar tek disa kafshë gjedhe në një fermë në Levél, edhe pse shumica e bagëtive ishin ende të shëndetshme.
Oficerët e policisë po kontrollojnë që vetëm një veteriner dhe punëtorët e autorizuar të kenë qasje në zonën e prekur. Pas urdhrit të autoriteteve, therja e kafshëve mund të zgjasë deri në dhjetë ditë.
Fermerët janë të shqetësuar për mundësinë e ndotjes së ujërave nëntokësore nga kufomat e varrosura.
Mihály Bakos, një banor i Csemeztanya, shprehu shqetësimin se puset e tij mund të ndoten, edhe pse autoritetet kanë premtuar një rrjet uji për të parandaluar këtë.
Pronari i Kooperativës Western Gate, Paul Meixner, shpjegoi se kjo është një masë e detyrueshme nën rregulloret veterinare të Bashkimit Evropian për të parandaluar përhapjen e sëmundjes.
Ai tha se, pavarësisht se vetëm 5% e tufës ishte e infektuar, të gjithë bagëtitë e fermës së tij do të theren.
Shpërthimi i Aftës Epizootike ka pasur një ndikim të rëndë financiar, pasi Ferma Levél do të humbasë deri në 3.7 milionë euro.
Mungesa e qumështit nga kjo fermë ka krijuar një humbje të madhe të të ardhurave.
Qeveria hungareze ka premtuar kompensim për fermerët, por ende nuk ka specifikime për shumën që do të ofrohet.
