Hoxhë Topulli jep mesazhe për përjetësinë, devotshmërinë dhe luftën kundër padrejtësisë

Nga OraNews Përditësimi i fundit 5 Mars 2025, 18:22

I ftuar në emisionin "Kjo është Koha" në Ora News, gjatë muajit të shenjtë të Ramazanit, ishte Hoxhë Topulli, i cili ndau mesazhe të rëndësishme mbi fenë, moralin dhe drejtësinë në Islam. Në këtë periudhë reflektimi dhe adhurimi, ai solli disa prej koncepteve kyçe të besimit islam, duke nxitur besimtarët të thellohen në lidhjen e tyre me Zotin dhe të forcojnë devotshmërinë e tyre.

Gjatë diskutimit, ai theksoi se njeriu nuk është krijuar për t'u zhdukur, por për përjetësi, prandaj dhe frika nga vdekja është një ndjenjë e natyrshme. Sipas Islamit, jeta nuk përfundon me këtë botë, por vazhdon në botën tjetër, dhe për këtë arsye, besimtarët duhet të përgatiten për jetën e përtejme me vepra të mira dhe devotshmëri.

Një tjetër mesazh i rëndësishëm i Hoxhë Topullit ishte mbi indiferencën, të cilën ai e cilësoi si një nga arsyet kryesore të përhapjes së së keqes. Ai rikujtoi se Islami na mëson të mos qëndrojmë të heshtur përballë padrejtësisë dhe se çdo musliman ka përgjegjësi për të ndërhyrë dhe për të ndihmuar në përmirësimin e shoqërisë. "I dërguari i Allahut (paqja qoftë mbi të) na ka mësuar se ai që sheh një të keqe duhet ta ndryshojë me dorë, me fjalë apo me zemër, dhe ky i fundit është niveli më i dobët i imanit," theksoi ai.

Në vijim, ai foli për suksesin në të dyja botët, duke e lidhur atë me mirësinë dhe devotshmërinë. "Suksesi i vërtetë nuk matet me pasuri apo pozitë, por me sa njeri i mirë je dhe sa i devotshëm je për Zotin," tha ai. Ai theksoi se gjatë Ramazanit, besimtarët kanë një mundësi të artë për të pastruar shpirtin e tyre, për të reflektuar mbi veprimet e tyre dhe për t'u afruar më shumë me Allahun përmes namazit, agjërimit dhe dhënies së sadakasë.

Në fund, ai foli për padrejtësinë, duke e cilësuar atë si një prishje të rendit kozmik të vendosur nga Zoti. "Allahu është i Drejtë dhe e do drejtësinë. Çdo padrejtësi është një shkelje e rregullit hyjnor dhe do të ketë llogari për të në Ditën e Gjykimit," tha ai.