Ambasadori Kirov: Bullgaria, mbështetëse e palëkundur e rrugëtimit evropian të Shqipërisë
Nga OraNews Përditësimi i fundit 5 Mars 2025, 12:56
Ambasada e Bullgarisë në Shqipëri zhvilloi një pritje zyrtare me rastin e Festës Kombëtare të vendit të saj (3 mars).
Miq të shumtë ishin të pranishëm në pritje, përfshirë ambasadorë, diplomatë, ministra, deputetë, gazetarë, biznesmenë, miq të ndryshëm.
Gjatë ceremonisë u ekzekutuan himnet e Shqipërisë dhe Bullgarisë, të cilat u përcollën me respekt.
Ambasadori i Bullgarisë në Shqipëri, Ivaylo Kirov, gjatë fjalës së tij tha se, “3 Marsi ka një rëndësi të thellë historike për Bullgarinë. Në këtë ditë në vitin 1878, Bullgaria u çlirua dhe fitoi sovranitetin e vet kombëtar. Kjo ditë simbolizon shpirtin e palëkundur dhe qëndrueshmërinë e popullit bullgar, i cili gjithmonë ka pasur si synim lirinë dhe pavarësinë. Kjo është një ditë krenarie dhe festimi për të gjithë bullgarët, kudo që të ndodhen nëpër botë”.
Ambasadori Kirov riafirmoi mbështetjen e palëkundur të Bullgarisë për Ukrainën.
“Në këtë moment, ne riafirmojmë mbështetjen tonë të palëkundur për Ukrainën, ndërsa ajo mbron sovranitetin dhe integritetin e saj territorial kundër agresionit rus. Bullgaria qëndron fort përkrah popullit ukrainas në luftën për liri, demokraci dhe paqe”, u shpreh ambasadori bullgar.
Ai gjithashtu evidentoi miqësinë e fortë dhe në rritje e sipër midis Bullgarisë dhe Shqipërisë.
“Sonte, ne jo vetëm që nderojmë historinë tonë të pasur, por gjithashtu festojmë miqësinë e fortë dhe në rritje e sipër midis Bullgarisë dhe Shqipërisë. Dy kombet tona ndajnë lidhje të thella historike, aspirata të përbashkëta dhe një vizion për të ardhmen në bazë të bashkëpunimit, solidaritetit dhe respektit të ndërsjellë. Na lidhin jo vetëm gjeografia, por edhe kultura, ekonomia dhe kontaktet mes njerëzve të zhvilluar gjatë viteve”, tha ai.
Kirov u shpreh se, “bashkëpunimi ynë shtrihet në fusha të ndryshme – nga tregtia dhe investimet deri në arsim, kulturë dhe integrimin evropian. Në fushën e ekonomisë bizneset tona po forcojnë lidhjet, duke krijuar mundësi për rritje dhe punësim në të dyja vendet. Ndërmarrjet bullgare dhe shqiptare po angazhohen gjithnjë e më shumë në projekte të ndërsjella të dobishme, dhe ne mbetemi të përkushtuar për të forcuar më tej lidhjet tona ekonomike përmes investimeve dhe inovacionit. Në fushën e arsimit shkëmbimet akademike dhe partneritetet midis universiteteve po nxisin përhapjen e njohurive dhe përmirësimin e perspektivave për gjeneratat e reja në të dyja vendet”.
“Në fushën e kulturës traditat tona me rrënjë të thella vazhdojnë të afrojnë popujt tanë dhe jemi krenarë për trashëgiminë tonë të përbashkët, duke promovuar shkëmbimet artistike dhe historike që nxjerrin në pah vlerat që na bashkojnë”, u shpreh ambasadori bullgar.
Kirov theksoi se, Bullgaria ka qenë gjithmonë një mbështetëse e palëkundur e rrugëtimit evropian të Shqipërisë, duke avokatuar për integrimin e saj në Bashkimin Evropian.
“Ne besojmë se përparimi i Shqipërisë në këtë drejtim nuk është vetëm në dobi të marrëdhënieve tona dypalëshe, por edhe të komunitetit evropian më të gjerë. Ne mbetemi të përkushtuar për të punuar së bashku për një Evropë të bashkuar, të begatë dhe paqësore. Përmes dialogut të vazhdueshëm, bashkëpunimit dhe përpjekjeve të ndërsjella mund të bëjmë edhe hapa më të mëdhenj të përbashkëta gjatë viteve në vijim”, tha ai.
Gjithashtu, ambasadori Kirov i kushtoi vëmendje minoritetit kombëtar bullgar në Shqipëri, i cili, theksoi ai, “shërben si një urë e gjallë mes dy kombeve tona”.
“Trashëgimia e pasur kulturore dhe kontributet në shoqërinë shqiptare të këtyre njerëzve janë një dëshmi e miqësisë së qëndrueshme dhe lidhjeve historike që ndajmë. Ne e vlerësojmë thellësisht rolin e tyre në forcimin e marrëdhënieve mes vendeve tona dhe mbetemi të përkushtuar për të mbështetur të drejtat, traditat dhe identitetin e tyre”, tha Kirov.
“Ndërsa ngremë gotat tona duke festuar, le të ngremë një dolli për miqësinë midis Bullgarisë dhe Shqipërisë, për begatinë e popujve tanë dhe për suksesin e vazhdueshëm të partneritetit tonë. Qoftë kjo mbrëmje një shenjë për lidhjet e forta që na bashkojnë dhe një frymëzim për bashkëpunime edhe më të mëdha në të ardhmen. Faleminderit të gjithë ju që jeni këtu sonte. Gëzuar për Bullgarinë, për Shqipërinë dhe për të ardhmen tonë të përbashkët”, përfundoi fjalën përshëndetëse ambasadori i Bullgarisë në Shqipëri, Ivaylo Kirov, gjatë pritjes zyrtare me rastin e Festës Kombëtare të Bullgarisë.
Një kuartet luajti pjesë muzikore gjatë ceremonisë.
