DASH pas dënimit të Dodik: Kundërshtojmë çdo veprim që do të minonte sigurinë e Bosnje-Hercegovinës
Nga OraNews Përditësimi i fundit 27 Shkurt 2025, 16:20
Departamenti Amerikan i Shtetit (DASH) tha se kundërshton çdo veprim të udhëheqësve lokalë në Bosnje-Hercegovinë që do të minonte sigurinë dhe stabilitetin e shtetit, tha zëdhënësja e DASH-it, Tammy Bruce, sipas “Sarajevo Times”.
Deklarata e Bruce erdhi pasi Gjykata e Bosnje-Hercegovinës dënoi presidentin i Republikës Sërpska, Millorad Dodik me një vit burg dhe gjashtë vjet ndalesë të ushtrimit të detyrës si president.
“Shtetet e Bashkuara të Amerikës kanë investuar për disa dekada për një Bosnje-Hercegovinë të qëndrueshme. Ne kundërshtojmë fuqishëm çdo veprim nga udhëheqësit lokalë që do të minonte sigurinë dhe stabilitetin. Ne mbështesim Marrëveshjen e Dejtonit dhe sovranitetin dhe integritetin territorial të Bosnjë e Hercegovinës”, shkroi Bruce në X.
Dodik është futur dy herë në listën e zezë amerikane për shkak të aktiviteteve të tij kundër Marrëveshjes së Paqes të Dejtonit të arritur më 1995.
Më 26 Shkurt, Gjykata në Bosnje-Hercegovinë caktoi dënimin ndaj Dodik për mosrespektim të vendimeve të përfaqësuesit të Lartë të bashkësisë ndërkombëtare, Christian Schmidt.
Ky është vendim i shkallës së parë, ndaj të cilit Dodik mund të ankohet. Dodik është përballur me gjyq nën akuzat se kishte nënshkruar dekrete presidenciale, përmes së cilëve kishte shpallur të vlefshme dy ligje jokushtetuese të Republikës Sërpska, të cilat më parë ishin shfuqizuar nga përfaqësuesi i Lartë.
Në Kodin Penal të Bosnje-Hercegovinës për mosrespektimin e vendimeve të përfaqësuesit të Lartë parashikohet dënim nga gjashtë muaj deri në pesë vjet burgim si dhe mundësi të shkarkimit nga detyra të një individi dhe ndalimi i veprimtarisë politike.
