Lavrov udhëton nesër drejt Turqisë. Në fokus të agjendës, përfundimi i luftës në Ukrainë
Nga OraNews Përditësimi i fundit 23 Shkurt 2025, 21:48
Ministri i Jashtëm rus, Sergei Lavrov, do të udhëtojë nesër drejt Turqisë për një vizitë ku do të diskutohet për mundësinë e përfundimit të luftës në Ukrainë dhe rolin që mund të luajë Ankaraja në këtë proces.
Sipas një burimi të Ministrisë së Jashtme turke, në fokus të takimeve do të jetë edhe kontributi i mundshëm i Turqisë pas takimeve të fundit të Lavrov me delegacionin amerikan mbi këtë çështje.
Turqia, anëtare e NATO-s, ka luajtur një rol të rëndësishëm si ndërmjetësuese që nga fillimi i luftës në vitin 2022, duke organizuar bisedimet e para midis Rusisë dhe Ukrainës. Burimi theksoi se vendi është i gatshëm të riaktivizojë përpjekjet për të promovuar dialogun dhe për të ndihmuar në arritjen e një zgjidhjeje paqësore.
Vizita e Lavrov vjen në një kohë të rëndësishme, pasi përkon me përvjetorin e tretë të fillimit të pushtimit rus të Ukrainës, duke shtuar rëndësinë e bisedimeve dhe mundësive për ndërmjetësimin në këtë periudhë kritike.
