Hoxha prezanton prefektin e ri të Kukësit: Garantimi i barazisë së votës, është prioritet i punës sonë
Nga OraNews Përditësimi i fundit 10 Shkurt 2025, 15:38
Ministri i Brendshëm, Ervin Hoxha prezantoi sot në Kukës prefektin e ri të qarkut, Dritan Baji. Baji zëvendëson në këtë detyrë Agron Gecën.
“Ky ndryshim është një hap më tej për të garantuar vazhdimësinë dhe vijimin e projekteve tona në rajonin verior”, u shpreh ministri Hoxha.
Ministri kërkoi angazhim në përmirësimin e shërbimeve publike, në rritjen dhe forcimin e investimeve infrastrukturore lokale, në sigurimin e një mjedisi dhe kushteve të përmirësuara për banorët, si dhe që prefekti të punojë ngushtë me të gjitha palët e aktorët, për të adresuar nevojat e qytetarëve të Kukësit, Hasit dhe Tropojës për të sjellë zhvillime të dukshme në rajon.
Teksa zgjedhjet e 11 majit po afrojnë, ministri Hoxha theksoi rëndësinë e sigurimit të kushteve që procesi elektoral i radhës të zhvillohet i qetë dhe transparent.
“Garantimi i barazisë së votës, posaçërisht votës së diasporës për herë të parë në histori, është prioritet i punës sonë”, tha Hoxha, ndërsa u bëri thirrje shqiptarëve që jetojnë e punojnë jashtë Shqipërisë, të regjistrohen në platformën e KQZ deri në 4 mars, të verifikojnë të dhënat e tyre dhe të sigurohen që janë gati për të votuar më 11 maj.
“Regjistrimi i diasporës është një hap i rëndësishëm për të garantuar, që zëri i çdo shqiptari të dëgjohet”, u shpreh ai.
Prefekti Baji e cilësoi si përgjegjësi dhe privilegj emërimin në këtë detyrë, teksa shprehu angazhimin për të vijuar më tej punën e kryer deri tani në shërbim të qytetarëve dhe komunitetit.
