Nervozizmi i Vlahovicit, Motta e ‘përkëdhel’, Giuntoli përgatit rinovimin
Nga OraNews Përditësimi i fundit 23 Dhjetor 2024, 17:52
Tek Juventusi, Dusan Vlahovic po përjeton një moment të veçantë. Gjesti i pakënaqësisë në pankinë pas zëvendësimit në fundin e ndeshjes kundër Monza-s është vetëm imazhi i fundit i një situate disi të tensionuar, të karakterizuar nga nervozizmi dhe disa çështje të rëndësishme ende të pazgjidhura për të ardhmen.
Sa i përket lojës, Dusan vazhdon të tregojë përkushtim dhe angazhim, por në ndeshjet e fundit paraqitjet e tij nuk kanë qenë gjithmonë në nivelin e pritshmërive të tifozëve bardhezi, as në aspektin teknik dhe as në atë të realizimit.
Një ecuri e paqëndrueshme që pas ndeshjes kundër Venezia-s shkaktoi gjithashtu një përplasje me ultrasit, duke e komplikuar më tej situatën dhe duke e detyruar lojtarin të kërkojë falje më pas përmes rrjeteve sociale për të riparuar marrëdhëniet.
Kjo lëvizje e afroi sërish Dusan-in me tifozët, por nuk mjaftoi për të larguar kritikat, duke detyruar Thiago Motta-n të ndërhynte sërish për të mbështetur lojtarin.
"Vlahovic nervoz? Dusan bëri një paraqitje të shkëlqyer, jam i kënaqur me atë që ka bërë," deklaroi trajneri bardhezi pas ndeshjes kundër Monza-s.
Deklarata që nuk lënë vend për dyshime dhe që konfirmojnë kënaqësinë e trajnerit për sulmuesin dhe dëshirën për ta siguruar për përkushtimin e tij në fushë.
Një ndjenjë e ngjashme, por me një kohë të ndryshme, është reflektuar edhe nga fjalët e Giuntoli-t mbi situatën kontraktuale të lojtarit. "Rinovimi i Vlahovicit?
Marrëdhëniet me djalin dhe agjentin e tij janë të jashtëzakonshme. Kemi vendosur të takohemi pas merkatos," shpjegoi drejtori sportiv bardhezi.
"Duke qenë se ka edhe një vit kontratë, ka ende kohë të mjaftueshme për të rregulluar gjithçka dhe për të vazhduar së bashku në mënyrën më të mirë të mundshme."
