Spahia: Veliaj, nga “dead man walking, në “dead man talking”
Nga OraNews Përditësimi i fundit 10 Dhjetor 2024, 15:55
Ish-kryetari i bashkisë Shkodër, Bardh Spahia ka reaguar për hetimin që së fundmi SPAK po i bën kryetarit të bashkisë Tiranë, Erion Veliaj dhe familjarëve të tij.
Postimi i Spahias:
Veliaj, nga “dead man walking, në “dead man talking”
Gjuha e urrejtjes së Erion Veliajt ndaj opozitës dhe kujtdo që tregon të vërtetën e korrupsionit të tij nuk e zhbën dot faktin kryesor se Erion Veliaj është njeriu kyç për të zbardhur aferën korruptive më të madhe të 34 viteve të fundit.
1. Erion Veliaj ideoi ndërtimin e incineratorit të Tiranës.
2. Erion Veliaj dha miratimin për ndërtimin e incineratorit në emër të 5 bashkive
3. Erion Veliaj uzurpoi kompetencat këshillin bashkiak dhe miratoi vetë planin financiar për incineratorin, duke dalë garant për të.
4. Erion Veliaj kishte kontrollin absolut mbi fushën e dherave në landfillin e Sharrës, ku vazhdojnë të luhen miliona euro fitim. Teorikisht, kjo pasuri i përket kompanisë së incineratorëve.
5. Erion Veliaj dhe Edi Rama miratuan një procedurë të kundërshtuar disa herë nga Ministria e Financave.
SPAK-u është i vonuar në të gjitha veprimet hetimore kundër Erion Veliajt. Kanë kaluar 4 vite që kur PD e denoncoi në SPAK këtë aferë, por SPAK e copëzoi dhe e ndau çështjen vetëm për të favorizuar Erion Veliaj dhe Edi Ramën.
Kontrollet e fundit në banesat dhe zyrat e familjes së tij janë parë si qesharake nga të gjithë, pasi ka muaj që në çdo kafe të Tiranës ka vetëm një lejtmotiv të përbashkët: “Lali s’i ka punët mirë”.
Përsa kohë, SPAK-u do të bëjë budallanë dhe sikur nuk kupton, Lalin s’e gjen gjë ligjërisht.
Ah po, politikisht? Politikisht e ka gjetur Arben Ahmetaj fjalinë e duhur: Erion Veliaj i duhet Edi Ramës si “dead man walking”.
Por sa të na tregojë nëpër statuse të dëshpëruar sesa shumë e mbështet lideri i tij suprem Edi Rama, bën mirë që Erion Veliaj ta kapërcejë aksiomën e Ben Ahmetajt dhe të kthehet në “dead man talking”.
