Buxheti 2025, Myzyri: KPP i ka kursyer buxhetit të shtetit gjatë këtij viti 466 milionë lekë
Nga OraNews Përditësimi i fundit 15 Nëntor 2024, 14:27
Buxheti për Komisionin e Prokurimit Publik për vitin 2025 do të jetë rreth 110.9 milionë lekë.
Kryetari i KPP, Jonaid Myzyri në seancën dëgjimore në komisionin për Çështjet Ligjore, Administratën Publike dhe të Drejtat e Njeriut të Kuvendit, për shqyrtimin e projektligjit “Për buxhetin e vitit 2025”, tha se nevojat reale janë më të larta se buxheti i parashikuar.
Teksa nënvizoi se buxheti për pagat është i mjaftueshëm, Myzyri tha se kërkon mbështetje për vijimin e funksionimit për ankesat elektronike dhe mirëmbajtjen e tij.
Fondet për shpenzimet kapitale janë të pamjaftueshme, tha Myzyri.
“Gjatë viti 2024 komisioni ka paguar edhe vlerën për likuidime pjesore, ndaj kërkojmë mbështetje për likuidimin e mbetur. Me ndryshimet e ligjit, sistemi i ankesave elektronike duhet të ketë ndryshime të nevojshme, duke iu përshtatur teknologjisë”, tha Myzyri.
Po ashtu, Myzyri kërkoi edhe mbështetje që të vlerësohet edhe mundësia e sigurimit të mjediseve të reja të punës.
Myzyri tha se Komisioni i Prokurimit Publik i ka kursyer këtë vit buxhetit të shtetit 469 milionë lekë.
“Kursimet e buxhetit të shtetit për 2024, KPP sipas llogaritjeve të kryera për vendimmarrje, nga janari në nëntor të këtij viti ka kursyer nga buxheti i shtetit 469 milionë lekë”, tha Myzyri.
