Buxheti 2025, Xhixho: 8.2 miliardë euro, nuk do të shkojnë për të përmirësuar jetën e qytetarëve, por...
Nga OraNews Përditësimi i fundit 15 Nëntor 2024, 09:11
Deputetja e Partisë së Lirisë Erisa Xhixho ka reaguar sërish lidhur me projektbuxhetin e parashikuar nga qeveria për vitin e ardhshëm.
Përmes një video-mesazhi të publikuar në rrjetet sociale, Xhixho shprehet se një buxhet prej 8.2 miliardë euro, nuk do të shkojnë për të përmirësuar jetën e qytetarëve.
REAGIMI I XHIXHOS
A e dini ku do të shkojnë paratë e qytetarëve me buxhetin e vitit 2025?
Një buxhet prej 8.2 miliardë euro, nuk do të shkojnë për të përmirësuar jetën e qytetarëve.
Pjesa më e madhe e parave publike shkon për projekte infrastrukturore, tendera ku kostot fryhen në mënyrë fiktive, dhe paratë shkojnë aty ku kanë shkuar gjithnjë: në xhepat e klientëve të qeverisë.
Me buxhetin e vitit 2025, qeveria i jep pjesën e luanit klientëve të saj dhe thërrimet qytetarëve.
Qeveria ka parashikuar të shtojë: 0.88 miliardë Lekë për kontrollin e chekup- it, një aferë korruptive;
1.9 miliardë lekë për koncesionin e sterilizimit, përsëri aferë korruptive;
1.9 miliardë lekë për shërbimet spitalore, ndërkohë që mbetet fakt se qytetarët shqiptarë, 60% të shpenzimeve i paguajnë nga xhepi;
1.3 miliardë lekë për inceneratorin fantazmë të Tiranës, mega-aferën e shekullit atë të incineratorëve.
Këto janë faktet se ku do shkojnë paratë e qytetarëve më të varfër në Evropë.
