Bienalia Ndërkombëtare e Artit për Inteligjencën Artificiale, Gripshi: 40 artistë nga 17 kombe mblidhen në Durrës

Nga Lili Saraçi Përditësimi i fundit 15 Tetor 2024, 13:06

“Inteligjenca Artificiale” është arsyeja dhe motivi i Bienales Ndërkombëtare të Artit, ku artistë nga mbarë bota do të mblidhen në Durrës.

Për të kuptuar më shumë mbi organizimin dhe atë çfarë pritet të ndodhë i ftuar në studion e lajmeve në “Ora Neës” ishte artisti dhe kuratori i saj Oltsen Gripshi.

“Ju falënderoj shumë për ftesën dhe falëminderti për hapësirën, ku përmes një ekranit tuaj të vogël, por të një impakti shumë të madh bën të njohur një bienale që është në edicionin e saj të parë, siç është Bienalja e Artit Bashkëkohor të Durrësit, një qyteti antik, një qyteti i cili shkëlqimin nuk e ka humbur ndër shekuj dhe mbërrin në ditët e sotme me këtë aktivitet kaq të rëndësishëm, ku bën bashkë 17 kombe të botës dhe me 40 artistë nga vende të ndryshme.

Pasi pavioni shqiptar dhe ai i Italisë ka më tepër artistë bashkë me atë të Kinës, kështu që përpos numrit të kombeve artistët janë disi më tepër dhe ata janë ftuar për të interpretuar inteligjencën artificiale dhe të ardhmen hibride.

Pse Durrësi? Kjo për disa motive, së pari unë jetoj atje. Për historinë të cilën ai qytet e mban mbi supe. E treta, qyteti i Durrësit kaq pranë kryeqytetit, por shumë larg aktiviteteve kulturore. Dhe për të shpërqendruar disi këtë monopolin e aktiviteteve kulturore në Tiranë, dhe për ta kthyer në një pikë referimi porsa i përket edukimit përmes kulturës.

Dhe ku ka më mirë e më bukur se sa një bienale në të cilën mbërrijnë artistë të nivelit ndërkombëtar dhe krijojnë pikërisht këtë aktivitet të rëndësishëm”, u shpreh ndër të tjera, artisti dhe kuratori i saj Oltsen Gripshi.