Spiropali: Bashkëpunimi rajonal, faktor themelor për përshpejtimin e procesit të integrimit
Nga OraNews Përditësimi i fundit 1 Tetor 2024, 11:20
Kryetarja e Kuvendit, Elisa Spiropali deklaroi sot se nxitja e bashkëpunimit rajonal konsiderohet nga Shqipëria si faktor themelor për përshpejtimin e procesit të integrimit europian në vendet e Ballkanit Perëndimor.
Nën kujdesin e Kryetares së Kuvendit, në sallën e seancave plenare zhvilloi sot punimet mbledhja e Asamblesë Parlamentare të Nismës për Europën Qendrore.
Spiropali u ndal te ecuria e procesit të integrimit europian të vendit, ndërsa theksoi se Shqipëria është në pritje të konferencës së dytë qeveritare.
“Vlerësojmë se mbështetja dhe bashkëpunimi proaktiv i shteteve anëtare të BE-së mbetet vendimtare për përparimin tonë në rrugën drejt integrimit europian. Për ne integrimi europian është zgjidhja e vetme”, tha Spiropali.
Duke u ndalur në fushën e turizmit dhe kulturës, Kryetarja e Kuvendit theksoi se përveç shënimit të një zhvillimi të vrullshëm turistik të vendit, është avancuar në përpjekjet për të ta kthyer rajonin në destinacion kryesor turistik.
“Synojmë krijimin e një pakete gjithëpërfshirëse turistike. Promovimi i diversifikimit të turizmit për të gjitha vendet e rajonit mbetet prioriteti ynë kryesor”, shtoi Spiropali.
