Spanja i bashkohet çështjes së gjenocidit të ngritur nga Afrika e Jugut kundër Izraelit
Nga OraNews Përditësimi i fundit 6 Qershor 2024, 13:43
Qeveria e Spanjës i është bashkuar gjyqit të hapur nga Gjykata Ndërkombëtare e Drejtësisë të iniciuar nga Afrika e Jugut kundër Izraelit për kryerjen e gjenocidit në Rripin e Gazës
Lajmi u bë i ditur gjatë një deklarate për shtyp të ministrit të Jashtëm spanjoll, José Manuel Albares. Afrika e Jugut nisi veprimet e saj ligjore në Hagë në fund të vitit të kaluar.
Në një vendim të përkohshëm, GJND-ja urdhëroi Izraelin të marrë të gjitha masat për të parandaluar gjenocidin dhe për të lejuar ndihmat humanitare për popullatën civile.
Në fund të muajit të kaluar, gjykata urdhëroi ndalimin e menjëhershëm të ofensivës izraelite në Rafah, në jug në Rripit të Gazës.
Izraeli ka hedhur poshtë akuzat për gjenocid dhe ka përmendur të drejtën e tij për vetëmbrojtje pas sulmeve të 7 tetorit. Mund të kalojnë vite përpara se GJND-ja të nxjerrë një vendim përfundimtar.
