ZGJEDHJET 2025/ Rama takon fituesit e Akademisë Politike të PS-së, dhe jep mesazh për Diasporën: Ritakohemi së shpejti
Nga OraNews Përditësimi i fundit 2 Maj 2024, 11:01
Një vit nga mbajtja e zgjedhjet parlamentare Partia Socialiste ka ndezur të gjithë makinerinë e saj politike.
E ndërsa opozita e kërkon në Kuvend, kryeministri Edi Rama zhvilloi sot një takim me fituesit e ciklit të parë të Akademisë Politike të Partisë Socialiste.
Në një ceremoni mirëseardhje, Kryeministri Rama u takua me djemtë dhe vajzat që u shpallën fitues, pas një procesi ku aplikuan në total 225 djem dhe 172 vajza.
Në fazën e dytë të Akademisë Politike të PS-së kaluan 100 aplikantë të cilët zhvilluan intervistat.
Partia Socialiste hapi më 9 prill aplikimet për regjistrime në Akademinë Politike të saj.
Në kuadrin e rienergjizimit të partisë të rinjtë e regjistruar në këtë akademi do të mësojnë më shumë për historinë dhe idetë e partive progresiste, por edhe të Partisë Socialiste të Shqipërisë.
Turi i takimeve me Diasporën
Ndërkaq Përgjatë muajve maj dhe qershor, Kryeministri Edi Rama, njëherësh kryetar i Partisë Socialiste, do të zhvillojë takime me komunitetet shqiptare jashtë vendit.
Kryeministri Rama shprehu sot kënaqësinë e posaçme të ritakimit së shpejti me shqiptarët që jetojnë, studiojnë, punojnë në Greqi, Itali, Angli e Gjermani.
Rama ndau në rrjetet sociale një videokartolinë të këngës më të bukur për Shqipërinë, dhuratë për brezat, të legjendares Vaçe Zela, “Rrjedh në këngë e ligjërime”.
Kryeministri Rama ndau dëshmi të shqiptarëve të kthyer nga emigrimi, të cilët kanë zgjedhur të ndërtojnë të ardhmen e tyre në vendlindje.
“Asnjë ëndërr sado e madhe nuk është me paarritshme kur e shohim. Si sot, shqiptarët nuk kanë qenë asnjëherë më parë”, tha Rama.
Ndërkohë emigrantët e rikthyer në Shqipëri shprehen se kanë dëshirë të bëjnë diçka në vendin e tyre.
“Përveç në Shqipëri nuk punoj për dikë tjetër”, tha njëri prej tyre.
“Vitet e fundit në Shqipëri shikoj një të ardhme që vazhdon gjithmonë në rritje”, tha një tjetër.
“Kthimi që kam bërë pas ishte gjëja më e mirë që kam bërë”, tha një tjetër emigrant.
Në kuadër të turit të takimeve që do të nisë së shpejti me synim “rienergjizimin e diasporës për Shqipërinë 2030”, Kryeministri Rama, njëherësh kryetar i PS-së pritet të zhvillojë takime me komunitetet shqiptare në Athinë, Milano, Londër dhe Mynih.
