Pampuri: Duhet miratuar në Kuvend një legjislacion specifik për personat autikë. Koha për një strategji kombëtare
Nga Lili Saraçi Përditësimi i fundit 3 Prill 2024, 12:07
Në Ditën Botërore të Ndërgjegjësimit për Autizmin, Partia Demokratike zyrtare përmes deputetes Oriola Pampuri kërkoi një ditë më parë miratimin e një legjislacioni specifik për personat me çrregullime të autizmit.
Për të kuptuar më shumë mbi këtë nismë, vetë deputetja Pampuri ishte e ftuar në studion e lajmeve në “Ora Neës”, ku theksoi se aktualisht nuk e ka legjislacionin e duhur për përkrahjen e këtyre personave.
“Në Komisionin për Shëndetësinë kemi diskutuar shpesh për personat me aftësi të kufizuar, por jo shumë për personat që vuajnë me spektrin e autizimit.,
Dhe mendoj se ka ardhur koha që të kemi një legjislacion spefik për çrregullimet e autizmit, por edhe për një strategji kombëtare për këtë çështje.
Vështirësitë që pëtrballen këta persona janë terapitë që janë tejet të shtrenjta, apo njëri prej prindërve është i detyruar të lërë punën, ndaj mendojmë që të ketë forma rimbursmi dhe trajtimi të veçantë nga shteti.”, u shpreh ndër të tjera deputetja demokrate Oriola Pampuri.
PROPOZIMI I PAMPURIT
"Duke njohur vështirësitë e personave me çrregullim autik në Shqipëri, që ende vazhdojnë të përballen me forma të stigmatizimit apo diskriminimit në shoqëri, institucionet publike, arsimore, shëndetësore, dhe në tregun e punës, për shkak të mosnjohjes së plotë apo të kufizuar duke përfshirë: diagnozën e vonuar ose të gabuar; mungesa e mbështetjes pas diagnozës; vështirësi në aksesin në arsim, shërbime sociale dhe shëndetësore; tranzicione të vështira nga fëmijëria në moshën madhore; kufizime për marrjen dhe qëndrimin në punë; shëndet i dobët mendor dhe praktika të papërshtatshme (siç është vendosja dhe trajtimi i pavullnetshëm në reparte psikiatrike); dhe problemet gjatë ndërveprimit me organet e zbatimit të ligjit dhe sistemin e drejtësisë.
Duke njohur se familjet e personave me çrregullimit autik bartin sistematikisht ngarkesa të konsiderueshme emocionale, ekonomike dhe të kujdesit. Autizmi ka ndikim jo vetëm tek personi me këtë çrregullim, por edhe tek familjet e tyre, kështu që numri i personave që preken është shumë më i lartë.
Ndaj në frymën e parimeve kushtetuese për garantimin gjithëpërfshirës e të drejtave dhe lirive e të qytetarëve,
Nëpërmjet kësaj rezolute kërkojmë miratimin e një legjislacionin specifik për personat me çrregullime të autizmit, si dhe strategjitë kombëtare të autizmit dhe planet e veprimit që janë në përputhje me Konventës e Kombeve të Bashkuara për të Drejtat e Personave me Aftësi të Kufizuara (KPAK)”.
Gjithashtu, Pampuri kërkoi “miratimin e një moduli trajnues detyrues për zbatim me profesionistët që ndërveprojnë me fëmijët me autizëm dhe familjarët e tyre, përfshirë, punonjësit socialë, mësuesit, profesionistë mjekësorë, oficerë policie, profesionistë ligjorë, etj.
Mbështetje në vazhdimësi përgjatë gjithë jetës të personave me autizëm, e një veçanti përgjatë fazës së zhvillimit nga fëmijë në moshë madhore.
Mbështetje për aftësimin profesional sipas nevojave të personave me autizëm dhe integrimi në tregun e punës nëpërmjet programeve dhe politikave të nxitjes së punësimit”.
Gjithashtu, Pampuri, kërkoi “përfshirjen e personave të spektrit autik dhe familjarëve të tyre në trajtimin e veçantë, për përfitimin e lehtësira për lëvizshmërinë, përdorimin e mjeteve të transportit publik urban pa u penguar nga pamundësia financiare për të aksesuar këto shërbime”.
