“Shpejt paratë e Bitcoinit!” Grabitje në Prishtinë, autorët morën çantën me euro
Nga OraNews Përditësimi i fundit 18 Dhjetor 2023, 13:35
Një grabitje e armatosur ka ndodhur sot në një pikë të këmbimit të kriptovalutave në lagjen Tophane në Prishtinë. Ngjarja ka ndodhur te njëra nga pikat e “ExCoins.me” ku dyshohet se grabitësit kanë marrë një shumë të madhe parash.
Lidhur me rastin, ka folur pronari i kompanisë, i cili tha se dyshohet se grabitja është kryer nga dy persona, të cilët janë futur në biznes me armë automatike dhe kanë arritur të marrin 45-50 mijë euro.
“Ka ndodhur një grabitje, dy persona kanë hyrë me kallashë edhe ju kanë bo presion punëtorëve. Shuma përafërsisht është diku nga 45 mijë deri në 50 mijë që janë marrë. Policia ndodhet në vendin e ngjarjes” – tha ai për mediat e Kosovës.
Lajmin e ka konfirmuar edhe Policia, e cila tha se po ndërmerren veprimet e nevojshme për të zbuluar rrethanat e ngjarjes.
“Sot rreth orës 10:00 është raportuar për një grabitje të ndodhur në një këmbimore në lagjen Tophane në Prishtinë. Pas marrjes së informacionit policia ka dalë në vendngjarje dhe bazuar në informacionet e para, dyshohet se nën kërcënim të armës është grabitur një shumë parash. Policia në koordinim me prokurorinë po ndërmerr veprimet e nevojshme policore me qëllim zbardhjen e rrethanave të rastit” – ka njoftuar Policia.
