Ukraina rrit prodhimin e dronëve luftarakë, bën përparime të vogla në lindje
Nga OraNews Përditësimi i fundit 8 Tetor 2023, 08:33
Rusia ka kryer dhjetëra sulme ajrore kundër Ukrainës gjatë natës midis 6 dhe 7 tetorit, përderisa ushtria ukrainase raportoi për vazhdimin e përparimit të ngadaltë në kundërofensivën e saj.
Shtabi i Përgjithshëm i ushtrisë ukrainase në buletinin ditor tha se forcat e tij po bënin përparim të ngadaltë në zonat e Melitopolit në jug dhe në Bahmut në lindje.
Një zëdhënës i forcave lindore ukrainase i tha Radios Evropa e Lirë më 6 tetor se forcat e Kievit kanë marrë “400 metra” territor në zonën e Bahmutit dhe po mbajnë pozicionet e reja kundër sulmeve të ashpra ruse.
“Nuk mund t’iu jap detaje sepse armiku e përdor këtë informacion”, tha zëdhënësi Ilya Yevlash. “Kur të bëjmë përparim më të madh, vetëm atëherë do të mund të flasim më hapur”.
Katër civilë raportohet se janë plagosur në qytetin e Odesës, që gjendet në Detin e Zi. Ata u plagosën gjatë një sulmi me raketë gjatë natës që goditi ndërtesa të banimit.
Raketa u lëshua nga rajoni ukrainas i Krimesë, që është nën pushtimin rus, tha ushtria ukrainase.
Alarme për sulme ajrore janë lëshuar gjatë natës në rajonet e Harkivit , Poltavës, Çernihivit dhe Sumit.
Në Rusi, ndërkaq, Ministria e Mbrojtjes raportoi më 7 tetor se një dron ukrainas është rrëzuar në zonën e Moskës, duke mos raportuar për asnjë dëm.
Kjo ministri tha se ka zmbrapsur një sulm me dron nga Ukraina edhe në Krime, afër qytetit-port të Sevastopolit.
Radio Evropa e Lirë nuk ka mundur të verifikojë këto pretendime.
Ukraina rrallë komenton për akuzat ruse lidhur me sulme brenda territorit të Rusisë.
Ukraina ka rritur prodhimin e dronëve në vitin e fundit pasi Rusia nisi pushtimin, tha kryeministri Denys Shmyhal.
Dyqind kompani kanë nisur prodhimin e dronëve të rinj luftues, tha ai në Kiev më 7 tetor.
“Tani progresi i dronëve nga zhvillimi i tyre deri te blerja është shumë i shkurtër”, tha Shmyhal.
Ai shtoi se industria ukrainase e mbrojtjes në mënyrë radikale ka ndryshuar qasjen dhe se kompania shtetërore e prodhimit të armëve, Ukroboronprom, është modernizuar.
Që kur Rusia nisi pushtimin e Ukrainës shkurtin e vitit 2022, dronët kanë ofruar një avantazh të madh në fushëbetejë.
Përderisa Ukraina fillimisht varej nga dronët e prodhuar nga kompania turke, Bayraktar, Rusia më vonë nisi të përdorte dronët iranianë, Shahed.
Muajve të fundit, sulmet me dronë në territorin e Rusisë janë shpeshtuar dhe janë tregues se Ukraina tani po prodhon dronë me rreze më të gjatë veprimi edhe pse sasia e eksplozivëve që bartin ende mbetet e vogël./REL
