Sulmi ndaj grave ukrainase shkakton zemërim në Republikën Çeke
Nga OraNews Përditësimi i fundit 25 Gusht 2023, 21:15
Pas një sulmi brutal ndaj dy grave ukrainase në Republikën Çeke pothuajse dy javë më parë, një gjykatë në Pilsen ka marrë në paraburgim një të dyshuar, njoftoi sot policia.
Sipas raportimeve të medias, dy gratë dhe fëmijët e tyre kishin vizituar një panair në qytetin Plasy, rreth 20 kilometra në veri të Pilsen.
Ndërsa ata ishin ulur në një bordurë buzë rrugës, dyshohet se një burrë doli nga makina e tij duke i pyetur nëse ishin nga Ukraina. Pas pyetjes, ai dhe një burrë tjetër i rrahën gratë, duke i thyer njërës prej tyre nofullën dhe hundën.
Komisionerja e qeverisë çeke për të drejtat e njeriut, Klára Šimáčková Laurenčíková, tha se ishte “absolutisht e papranueshme” që dikush të sulmohej vetëm për shkak të kombësisë.
“Ju uroj shërim të shpejtë grave dhe forcë fëmijëve të tyre që u desh të ishin dëshmitarë të sulmit”, tha Laurenčíková në platformën X.
“Policia nuk do të tolerojë gjuhën e urrejtjes apo aktet e urrejtjes”, theksoi ministri i Brendshëm, Vít Rakušan.
Që nga fillimi i luftës ruse në Ukrainë, Republika Çeke ka siguruar strehim të përkohshëm për më shumë se gjysmë milioni ukrainas.
Sipas Ministrisë së Brendshme në Pragë, rreth 325,000 refugjatë janë ende në vend, i cili ka rreth 10,5 milionë banorë.
