Italia shpall alarmin më të lartë të nxehtësisë në 16 qytete
Nga OraNews Përditësimi i fundit 22 Gusht 2023, 20:06
Një zjarr në pyll që shpërtheu në ishullin italian të pushimeve Elba që nga mbrëmja e djeshme ka detyruar evakuimin e 700 personave, ndërsa Ministria italiane e Shëndetësisë shpalli sot alarmin më të lartë të nxehtësisë për 16 qytete.
“Evakuimet u bënë nga një kamping dhe disa ndërtesa banimi”, njoftoi Mbrojtja Civile e rajonit të Toskanës në platformën online X, dikur e quajtur Twitter.
Gjithsej 14 hektarë tokë janë djegur deri më tani, por zjarri thuhet se është vënë nën kontroll mëngjesin e sotëm.
Nëse situata nuk përkeqësohet, njerëzit e evakuar mund të kthehen në shtëpitë dhe strehimoret e tyre sot në mbrëmje.
Pyjet midis qyteteve Rio Marina, Porto Azzurro dhe Ortano janë veçanërisht të prekura nga flakët në ishull, i cili është i njohur për pushuesit. Deri më tani nuk ka pasur raportime për viktima.
Sipas zjarrfikësve, zjarri ka rënë mbrëmjen e së hënës dhe është përhapur me shpejtësi për shkak të erës.
“Në pjesën më të madhe të vendit, banorët po përballen me temperatura deri në 38 gradë Celsius”, tha Ministria e Shëndetësisë.
Kryesisht, janë prekur rajonet veriore dhe qendrore të vendit mesdhetar. Sipas shërbimit të motit ilmeteo.it, Roma, Firence dhe Bolonja mund të arrijnë 38 gradë. I nxehti vazhdon edhe në Tirolin e Jugut.
