EMRI/ I merrte para qytetarëve për të parkuar në hapësira publike, arrestohet 57-vjeçari në Durrës
Nga OraNews Përditësimi i fundit 21 Gusht 2023, 12:53
Një 57 vjeçar është arrestuar në Durrës pasi i merrte para qytetarëve për të parkuar. Andon Qose 57 vjeç ra në prangat e policisë pasi i merrte para qyetarëve për vendparkime që ishin publike. Ky është rasti i tretë që goditet nga policia i personave që marrin para për parkime në hapësira publike.
Njoftimi i policise Durrës:
Durrës/Kontrolle dhe verifikime në zona me frekuentim të lartë publik, për të konstatuar dhe goditur rastet kur hapësirat publike, shfrytëzohen në kundërshtim me ligjin, për qëllime fitimprurëse.
Përvetësonte para nga qytetarët që parkonin automjetet në një hapësirë publike që ishte vendparkim pa pagesë, arrestohet 57-vjeçari.
Gjatë këtij sezoni turistik, ky është rasti i tretë i goditur nga Policia, i paligjshmërive me hapësirat e destinuara nga bashkia e Durrësit, si vendparkime pa pagesë.
Specialistët për Hetimin e Krimeve Ekonomike dhe Financiare të DVP Durrës, si rezultat i kontrolleve dhe verifikimeve, ndaj subjekteve ekonomike që zhvillojnë aktivitetin e tyre në qarkun e Durrësit, kanë konstatuar dhe kanë goditur një tjetër rast të shfrytëzimit të hapësirave publike, në kundërshtim me ligjin, për qëllime përfitimi.
Për këtë rast, është vënë në pranga shtetasi A. Q., 57 vjeç, banues në Durrës, pasi iu merrte para qytetarëve, për të parkuar automjetet në një hapësirë, në lagjen nr. 14, hapësirë e cila ishte destinuar nga bashkia e Durrësit, si vendparkim pa pagesë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
