PD votime mes sherrit/ Nesër zgjedhjet për kreun e partisë, kush do ta marrë vulën?
Nga OraNews Përditësimi i fundit 28 Korrik 2023, 11:14
Të shtunën 25 mijë anëtarë të Partisë Demokratike që ka dhe të drejtën e vulës, do të zgjedhin në garën për kryetar mes Lulzim Bashës dhe Gjergj Hanit.
Por cështja tashmë është shndërruar në një konflikt për të drejtën e vulës. Sekretari i Përgjithshëm Gazmend Bardhi të enjten deklaroi se këshilli kombëtar anuloi votimet. Por për anëtaren e kryesisë Oriola Pampuri këto janë skenarë që nuk i kanë hije demokratëve.
"Të nderuar anëtarë të Partisë Demokratike, nesër është një ditë e rëndësishme për të gjithë demokratët, por pa diskutim dhe për të gjithë shqiptarët, të cilët u lodhën në këto dy vite me skena të cilat nuk do ti kishin hije Partisë më të madhe të djathtë në Shqipëri, me skena të cilat nuk mund të ngjallnin kurrsesi shpresë dhe besim.
Shqiptarët nga nesër meritojnë një parti demokratike të konsoliduar, të organizuar, një parti demokratike, lidershipi i së cilës të jetë në partneritet të ngushtë me ShBA, Bashkimin Europian dhe Britaninë e Madhe.
Është e qartë se shqiptarët janë të lodhur me skena e debate, retorike të përsëritur politike, të cilat i interesojnë vetëm një njeriu: Edi Rames.
Shqiptarët duan zgjidhje, duan një opozitë të fortë sot dhe një alternativë qeverisese nesër. Demokratët duan të rikthehet shpresa. Dhe nga nesër nis rrugëtimi për ndryshimin e shumëpritur.
Ftoj çdo anëtar të Partisë Demokratike, që ti drejtohet nesër kutive të votimit për të finalizuar procesin e zgjedhjes së kryetarit të PD. E bashke me të nisjen e procesit të ringritjes së Partisë Demokratike.
Së bashku do ta bëjmë Partinë Demokratike, alternativën më të mirë, dhe do të rikthejmë shpresën tek demokratët dhe mbarë shqiptarët."
