Zelensky: Siguria e porteve të Detit të Zi është çelësi i paqes
Nga OraNews Përditësimi i fundit 26 Korrik 2023, 13:59
Këshilli i ardhshëm NATO-Ukrainë duhet të përfshijë në fokusin e vet sigurinë e porteve të Ukrainës dhe eksportet e grurit, deklaroi presidenti ukrainas, Volodymyr Zelensky.
“Bota e di se siguria e porteve tona të Detit të Zi është çelësi i paqes dhe stabilitetit në tregun global të ushqimit”, tha Zelensky në fjalimin e tij video të mbrëmjes të martën.
“Siguria ushqimore është një prioritet i rëndësishëm globalisht dhe pjesë e Formulës së Paqes të Ukrainës”, shtoi ai.
”Organizmi i sapokrijuar do të takohet të mërkurën në nivel ambasadori dhe do të diskutojë sigurinë në Detin e Zi”, tha Zelensky.
Rusia ndaloi marrëveshjen e drithit në Detin e Zi, e cila i kishte lejuar Ukrainës të shiste rreth 33 milionë tonë drithë dhe ushqime, pavarësisht konfliktit të vazhdueshëm, në fillim të këtij muaji.
