Stuhia nxjerr nga shinat dy trena në Zvicër, të paktën 12 të plagosur
Nga OraNews Përditësimi i fundit 31 Mars 2023, 19:57
Terrori mbretëroi në Zvicër kur dy trena dolën nga shinat, duke plagosur shumë persona në bord.
Trenat rajonalë dolën nga shinat të premten, vetëm disa kilometra larg njëri-tjetrit dhe rreth gjysmë ore larg njëri-tjetrit, në veri të Bernës.
Një incident përfshinte një tren në Lussertz dhe tjetri një tren që udhëtonte në rajonin administrativ Bern-Mittelland në Kantonin e Bernës.
Në incidentin e parë nuk dihet numri i të plagosurve, ndërsa në të dytin janë të paktën 12, mes tyre tre fëmijë.
Njëri prej tyre ndodhet i shtruar në spital në gjendje të rëndë, ndërsa gjendja shëndetësore e të tjerëve nuk paraqet shqetësim.
Autoritetet nuk kanë bërë të ditur se sa pasagjerë ishin në dy trenat.
Sipas policisë së Bernës, aksidenti në Lussertz ka ndodhur rreth orës 16:30 me orën lokale në linjën Biel-Täuffelen-Anet, ku disa vagonë kanë rënë anash.
Ai seksion i hekurudhës është mbyllur, ndërsa në vendngjarje kanë mbërritur zjarrfikëse dhe ambulanca.
Aksidenti i dytë ndodhi pak para orës 17:00 me orën lokale, ku një pjesë e trenit u përmbys, duke çuar në anulime. Në zonën ku frynin erëra të stuhishme , ekipet e shpëtimit nxituan për të ofruar ndihmën e parë.
Vihet re se një valë e fortë e motit të keq po godet Zvicrën, pasi erërat e stuhishme po përfshijnë disa zona. Shpejtësitë, në fakt, arritën deri në 122 km në orë.
Që nga mëngjesi, shërbimi meteorologjik i Zvicrës ka regjistruar mbi 5000 vetëtima.
Moti i keq në Zvicër vjen nga stuhia Mathis, e cila po përfshin pjesën më të madhe të Britanisë, duke sjellë shi të dendur dhe erëra të forta.
Hetimet për rrethanat e sakta të daljes së trenave nga shinat po vazhdojnë.
