Për herë të parë që nga rikthimi në pushtet, talibanët ekzekutojnë publikisht një njeri

Nga OraNews Përditësimi i fundit 7 Dhjetor 2022, 18:43

Ishte e parashikueshme që do të mbërrinin sërish në këtë pikë.Talibanët kanë ekzekutuar publikisht një burrë për herë të parë që nga kthimi në pushtet në Afganistan.

Personi i dënuar për vrasje u vra të mërkurën "gjatë një tubimi publik të banorëve", tha zëdhënësi i talebanëve Zabihullah Mujahid.

Ekzekutimi u krye në provincën perëndimore të Farahut para qindra spektatorëve dhe shumë zyrtarëve të lartë talibanë, duke përfshirë nga kryeqyteti Kabul dhe provinca, tha zëdhënësi.

Muxhahidi iu referua parimit të hakmarrjes të lejuar në ligjin islam. Në mesin e nëntorit, udhëheqësi taleban Hibatullah Achundsada u bëri thirrje gjykatësve të vendit që të zbatojnë plotësisht ligjin islam dhe katalogun e tij të dënimeve, duke përfshirë ekzekutimet publike, gurëzimin dhe fshikullimin, dhe amputimin (prerjen) e gjymtyrëve në rastin e hajdutëve.

Që atëherë, disa persona janë rrahur publikisht për vepra të ndryshme. Megjithatë, ekzekutimi në Farah është i pari që shpallet zyrtarisht.

Veprimi nënvizon qëllimin e sundimtarëve afganë që t'i përmbahen interpretimit të tyre të rreptë të ligjit islam, Sheriatit.

I dyshuari besohet të jetë banor i rrethit Anjil në provincën Herat. Burri u dënua, sipas talibanëve, për vrasjen e një burri tjetër pesë vjet më parë dhe vjedhjen e motoçikletës dhe celularit të tij.

Forcat e sigurisë talibane arrestuan Tajmirin pasi familja e viktimës e akuzoi atë për krimin, thuhet në një deklaratë zyrtare.

Pas marrjes së pushtetit në Afganistan në vitin 2021, në javët e fundit të tërheqjes së trupave të SHBA-së dhe NATO-s nga vendi pas 20 vjetësh, talibanët fillimisht premtuan të jenë më të moderuar dhe të lejojnë të drejtat e grave dhe të pakicave.

Mirëpo, ndërkohë, milicia është bërë gjithnjë e më radikale: ka kufizuar të drejtat dhe liritë dhe, ndër të tjera, ka vendosur ndalimin e shkollimit të vajzave pas klasës së gjashtë.

Ajo gjithashtu ka kryer fshikullime publike në provinca të ndryshme dhe ka dënuar disa burra dhe gra të akuzuar për vjedhje, tradhti bashkëshortore ose ikje nga shtëpia.