Lija e majmunëve/ Mbërrijnë testet e para në Shqipëri
Nga OraNews Përditësimi i fundit 27 Qershor 2022, 11:44
Në Shqipëri nuk ka raste të dyshuara me linë e majmunit, por të hënën mbërritën 250 testet e para që do të bëjnë të mundur diagnostikimin e infeksionit.Testimet tha Ministrja e Shëndetësisë do të kryhen në Institutin e Shëndetit Publik.
Kanë mbërritur këtë të hënë në Shqipëri 250 testet e para për diagnostikimin e rasteve të dyshuara me linë e majmunit apo kontakteve të tyre.
Testimet do të kryhen në Institutin e Shëndetit Publik.
“Në laboratorin e referencës në Institutin e Shëndetit Publik tashmë ne kemi bërë të mundur që për 250 rastet të para që mund të jenë të dyshuara, të kemi dhe testet specifike në këtë laborator. Pra, do të kemi mundësi që pikërisht në këtë laborator, pa i çuar në laboratorët e referencës, të mundet të testojmë raste të dyshuara dhe gjithashtu kontaktet e dyshuara të rasteve”, bëri me dije Ministrja e Shëndetësisë Ogerta Manastirliu.
Deri më tani në vendin tonë nuk ka raste të dyshuara.
Drejtorja e Institutit të Shëndetit Publik, Eugena Tomini, tha se situata është nën monitorim.
Duke folur për situatën epidemiologjike, ku ditët e fundit është vënë re një rritje e rasteve pozitive me Covid19, Manastirliu i bëri apel qytetarëve që të vijojnë të vaksinohen.
