Nuk iu bind urdhrit për të ndaluar, pas arrestimit policia zbulon se është hajduti i 4 vjedhjeve në Kavajë

Nga OraNews Përditësimi i fundit 26 Janar 2022, 11:34

Policia e Kavajës ka vënë në pranga një 21-vjeçar, i dyshohet si autor i katër vjedhjeve gjatë ditëve të fundit në Kavajë.

Arrestimi i tij ka ardhur nga një kontroll i rastësishëm i policisë.

Ai ka tentuar të braktisë mjetin duke mos iu bindur urdhrit të punonjësve të Policisë.

"Specialistët për Hetimin e Krimit në Komisariatin e Policisë Kavajë bënë arrestimin e shtetasit A. U., 21 vjeç për veprat penale: "Prodhimi dhe mbajtja pa leje e armëve të gjuetisë dhe sportive", "Prodhimi, mbajtja, blerja apo shitja pa leje e armëve të ftohta", "Mosbindja ndaj urdhrit të punonjësit të policisë së rendit publik" dhe "Drejtimi i automjeteve në mënyrë të parregullt".

Ky shtetas, duke drejtuar automjetin në mënyrë të parregullt, nuk i është bindur urdhrit të punonjësve të Policisë së Patrullës së Përgjithshme, ka braktisur mjetin dhe ka tentuar të largohet.

Gjatë kontrollit të banesës së tij, nga shërbimet e Policisë iu gjetën dhe iu sekuestruan në cilësinë e provës materiale një armë gjahu pa leje, fishekë luftarakë, një dorezë metalike dhe një maskë që dyshohet se përdoret për vjedhje.

Nga veprimet e para hetimore të kryera rezulton se ky shtetas dyshohet të jetë autor i 4 vjedhjeve të ndodhura gjatë ditëve të fundit, konkretisht:

- Më datë 19.01.2022, në fshatin Rrakull, Kavajë, dyshohet se ka vjedhur në banesën e shtetasit Xh. T.;

- Më datë 19.01.2022, në fshatin Bago, Kavajë, dyshohet se ka vjedhur në banesën e shtetasit Xh. V.;

- Më datë 21.01.2022, në lagjen nr. 3, Kavajë, dyshohet se ka vjedhur në banesën e shtetasit Xh. L.;

- Më datë 24.01.2022, në fshatin Golem, Kavajë, dyshohet se ka vjedhur në banesën e shtetases E. S.

Materialet i kaluan Prokurorisë së Rrethit Gjyqësor Kavajë, për veprime të mëtejshme procedurale.