Ambientalistët francezë protestojnë për ligjin e klimës, kërkojnë rishikimin e Kushtetutës
Nga OraNews Përditësimi i fundit 10 Maj 2021, 12:13
Ambientalistët francezë janë mobilizuar pas dyshimit se qeveria dhe Presidenti francez nuk do i përmbahet zotimeve për mjedisin dhe klimën.
Në kryeqytetin e Francës marshuan të dielën mijëra aktivistë dhe qytetarë.
Ata kërkojnë rishikimin e kushtetutës, që të përcaktojë me ligj themelor që "Franca garanton mbrojtjen mjedisore dhe diversitetin biologjik, dhe lufton ndryshimet klimatike."
Nisma e propozuar kushtetuese është miratuar nga Kuvendi, por dhoma e Senatit pritet ta bllokojë, duke e bërë të pamundur dërgimin e saj përpara një referendumi popullor.
"Jemi këtu që të tregojmë se si qytetarë kemi pushtet, fuqinë për të ndryshuar klimën, modelet e konsumit dhe fuqinë për të ndryshuar përfaqësuesit tanë politikë."
"Ajo që na duhet të ndërtojmë tani është një shumicë e re për Francën, me fokus të qartë te emergjenca ekologjike. Pas çdo tërheqjeje, në vëmë re se kjo qeveri e shikon ekologjinë thjesht si manovër politike."
Presidenti Emanuel Macron vitin e ardhshëm synon një tjetër mandat presidencial dhe kishte premtuar referendum për kauzën e ambientalistëve, por kundërshtarët e tij e kanë fajësuar për hipokrizi, dhe kanë akuzuar qeverinë se nuk ka negociuar sa duhet me Senatin për ta penguar qëllimisht procesin.
