Mungesa pandemike, spitali pa vitaminë C

Nga OraNews Përditësimi i fundit 9 Mars 2021, 07:41

Familjarëve të pacientëve me COVID-19, të cilët janë të shtrirë në klinikat e Shërbimit Spitalor Klinik dhe Universitar të Kosovës (SHSKUK), vazhdimisht u kërkohet që të blejnë ilaçet për trajtimin nga koronavirusi.

Samir Fejziu, nëna e të cilit është e shtrirë në Klinikën e Pulmologjisë, thotë për Radion Evropa e Lirë, se pavarësisht se është thënë që kjo klinikë ka medikamentet e duhura, ata po detyrohen që të blejnë ilaçet që mungojnë.

“E kam nënën këtu, është post-COVID. Me COVID-19 e kam pas edhe babanë dhe nënën, e na ka kushtuar (shërimi) shumë. Në fillim nga gjashtë infuzione, disa i kanë pasur, por shumicën nuk i kanë pasur, është dashur të blihen”, tregon Fejziu.

Në Klinikën e Pulmologjisë në Qendrën Klinike Universitare të Kosovës, aktualisht po trajtohen rreth 25 pacientë të prekur nga sëmundja COVID-19, që e shkakton koronavirusi i ri.

Rifat Aliu, nga fshati Qylagë në Komunën e Lipjanit, thotë se nuk e di se cilat medikamente i ofron kjo klinikë, por siç shprehet ai, vazhdimisht ka kërkesa nga personeli shëndetësor, që të blihen barna.

“Unë nuk jam profesionist që t’ua di emrat medikamenteve, por shumicën i blejmë vetë. Nuk e di këtu çka ka, veç këtyre infuzioneve që i japin, të tjera barna nuk e di çka ka”, shprehet ai.

Drejtori i Klinikës së Pulmologjisë, Musa Hoxha, tha për Radion Evropa e Lirë se gjatë fundjavës, ka pasur mungesë të disa barnave, përfshirë edhe të vitaminës C.

“Do të thotë, vetëm vitamina C ampula nuk ka. Ciprofloxacin (antibiotik që përdoret për një sërë infeksionesh bakteriale) deri të premten nuk ka pasur. Të premten ka ardhur, por zëvendësuesi i tij ka qenë”, tha Hoxha.

Ndërkaq, drejtori i Shërbimit Spitalor Klinik Universitar të Kosovës, Valbon Krasniqi, shpjegoi për Radion Evropa e Lirë se shumë barna që përdoren kundër koronavirusit, spitalet i kanë.

“Sa i përket barnave anti-COVID, me përjashtim të atyre barnave që kam deklaruar edhe më herët, të tjerat janë. Disa vitamina në formë tablete nuk ka pasur ofertues asnjëherë nga asnjë kompani. Pra, nuk kanë sjellë oferta. Ndërkaq, në forma të ampulave të vitaminave, atyre që vendosen në infuzione, janë të disponueshme”, tha Krasniqi.