Garancia për zgjedhjet në Kosovë, KQZ-ja firmos memorandum bashkëpunimi me organet ligjzbatuese

Nga OraNews Përditësimi i fundit 12 Shkurt 2021, 15:06

 “Shfrytëzoj rastin që të ftoj të gjitha subjektet politike, votuesit dhe të gjithë ata që kanë rol në këto zgjedhje, të dëshmojmë edhe njëherë se si shtet i ri jemi të aftë të organizojmë zgjedhje të lira demokratike dhe të pranueshme për të gjithë," u shpreh Daka.

Një trupë e gjerë me rreth 150 prokurorë, gjyqtarë dhe zyrtarë të tjerë të hetuesisë janë angazhuar për 14 shkurtin.

Drejtuesi i Policisë garantoi situatën me rendin, ndërsa Prokuroria paralajmëroi ata që kapen duke fotografuar votën.

 “Inkurajojmë të gjithë qytetarët e Republikës të Kosovës, që për çdo parregullsi, edhe mediat, të njoftojnë Policinë e Kosovës dhe ne do të jemi në dispozicion. Dëshirojmë që kjo ditë e zgjedhjeve të shkojë në frymën e ditëve festive dhe të mos kemi incidente”, tha Ajvazi.

 “Fotografimi i votës është e vërtetë që nuk është vepër penale. Mirëpo çdo person i cili do të rastisë të fotografojë votën në qendër të vendvotimit, do të arrestohet menjëherë nga Prokurori i Shtetit me qëllim të ndalimit dhe të intervistimit dhe të arsyes se pse e ka fotografuar atë votë," tha Pula.

Paneli Zgjedhor për Ankesat u zotua se do i japë zgjidhje shpejt pretendimeve të palëve, ndërsa në monitorim do mbahen edhe mediet, për raportimin sa më të paanshëm.

 “Ne kemi filluar monitorimin 1 javë para se të fillojë procesi zgjedhor. Dje e kemi pasur një mbledhje të jashtëzakonshme ku për shkeljet para fillimit të fushatës zgjedhore kemi identifikuar 5 televizione, të cilat kanë transmetuar përmbajtje programore pa sponsorizim," u shpreh Latifi.

Ndërkaq, të premten, Komisioni Qendror i Zgjedhjeve i Kosovës priti nga Sllovenia mbi 1 milion e 617 mijë fletëvotime, të cilat në pak orë do u shpërndahen 38 komunave, rreth 900 qendrave në gati 2.400 vendvotime.

KQZ-ja ka porositur një numër fletësh më të vogël se ai i votuesve të përgjithshëm, por vota u është premtuar të gjithëve.

 “Asnjëherë nuk është paraqitur mungesë e fletëvotimeve në vendvotime, por edhe në raste të tilla kur pjesëmarrja është e lartë në një vendvotim, natyrisht se ka fletëvotime rezervë të cilat mund të përdoren dhe askush nuk do mbetet pa votuar, asnjë qytetar cili do shkoj në vendvotime e tij nuk do mbetet pa votuar," tha Elezi.