TRAFIKIM NJERËZOR NË ONLYFANS! Policia çeke godet rrjetin e dyshuar

Nga Katerina Hysenllari Përditësimi i fundit 2 Qershor 2026, 15:24

Katër persona janë akuzuar në Çeki për trafikim njerëzor dhe shfrytëzim të të rejave për përmbajtje erotike në internet. Sipas hetimeve, viktimat detyroheshin përmes presionit psikologjik të krijonin materiale gjithnjë e më eksplicite.

Autoritetet çeke kanë ngritur akuza ndaj katër personave dhe një kompanie, të dyshuar për trafikim njerëzor dhe shfrytëzim të të rejave për prodhimin e përmbajtjeve erotike në platformën OnlyFans dhe rrjete të tjera sociale.

Sipas policisë, grupi kishte rekrutuar dhjetëra vajza të cilat sapo kishin mbushur moshën 18-vjeçare.

Hetimet tregojnë se të dyshuarit kanë përfituar nga papjekuria, mungesa e përvojës dhe situata e vështirë sociale e viktimave për t’i bindur ato të krijonin materiale erotike pa pasur kontroll mbi përdorimin e tyre.

Pas fitimit të besimit të vajzave, të akuzuarit i shtynin ato të nënshkruanin kontrata për menaxhimin e profileve në rrjetet sociale, kryesisht në OnlyFans.

Sipas policisë, shumica e viktimave nuk kishin akses në llogaritë e hapura në emrin e tyre dhe nuk kontrollonin publikimin apo shpërndarjen e materialeve.

Hetuesit thonë se me kalimin e kohës grupi përdorte presion psikologjik, kërcënime me gjoba dhe ndalim pagesash për t’i detyruar viktimat të prodhonin përmbajtje gjithnjë e më eksplicite, shpesh kundër vullnetit të tyre.

Sipas autoriteteve, aktiviteti i dyshuar ka gjeneruar të ardhura prej të paktën 3.6 milionë koronash çeke, ose rreth 150.000 euro.

OnlyFans, platforma e krijuar në vitin 2016, numëron qindra milionë përdorues në mbarë botën dhe u mundëson krijuesve të përmbajtjes të shesin foto dhe video me pagesë. Megjithatë, vitet e fundit ajo është përballur me kritika dhe hetime lidhur me publikimin e materialeve pa pëlqimin e personave të përfshirë.

Një raport i mëparshëm ka dokumentuar dhjetëra ankesa në Shtetet e Bashkuara dhe Britaninë e Madhe nga persona që pretendojnë se janë shfaqur në përmbajtje me natyrë seksuale pa autorizimin e tyre.