Mos i fut në frigorifer!/ 6 ushqime që humbasin shijen dhe cilësinë kur ruhen në të ftohtë
Nga OraNews Përditësimi i fundit 10 Maj 2026, 17:26
Shumë njerëz i ruajnë të gjitha ushqimet në frigorifer për t’i mbajtur të freskëta, por disa produkte në fakt humbasin cilësinë kur mbahen në temperatura të ulëta.
Ekspertët e ushqimit këshillojnë që disa ushqime të mos futen në frigorifer, pasi ndryshojnë shijen, strukturën dhe vetitë e tyre natyrale.
Ndër to janë domatet, të cilat në të ftohtë humbasin aromën dhe bëhen më të buta.
Patatet gjithashtu ndryshojnë përbërjen, duke e kthyer niseshtenë në sheqer dhe duke ndikuar në shijen e tyre.
Qepët dhe hudhra nuk rekomandohen në frigorifer, sepse lagështia i bën të zbuten, të myken më shpejt ose të humbasin aromën karakteristike. Edhe buka thahet më shpejt në frigorifer dhe bëhet e fortë, ndaj zakonisht ruhet në temperaturë ambienti ose në ngrirje nëse duhet të mbahet më gjatë.
Po ashtu, mjalti nuk ka nevojë për frigorifer, pasi nuk prishet në kushte normale. Në të ftohtë ai mund të kristalizohet dhe të bëhet më i vështirë për përdorim.
Sipas këtyre këshillave, mënyra e ruajtjes së ushqimeve ndikon drejtpërdrejt në shijen dhe cilësinë e tyre, ndaj jo gjithçka duhet futur automatikisht në frigorifer.
