Kurti e çon Kosovën drejt zgjedhjeve, Çejku: Një “aventurë e papërgjegjshme” përballë një opozite të dobët

Nga OraNews Përditësimi i fundit 30 Prill 2026, 22:32

Kosova po shkon drejt zgjedhjeve të parakohshme, duke thelluar krizën politike të nisur nga pamundësia për të zgjedhur presidentin e ri.

Për ish-ambasadorin Arben Çejku ky zhvillim përshkruhet si një "aventurë e papërgjegjshme" e kryeministrit në detyrë, Albin Kurti, i cili po përfiton nga një opozitë e dobët dhe e paorganizuar.

I ftuar në studion e emiiosnit “Drejt” në “Ora News”, Çejku e sheh këtë lëvizje si një kombinim të qasjes së Kurtit ndaj pushtetit dhe paaftësisë së opozitës për të vepruar si një forcë unifikuese.

Sipas tij, opozita, pavarësisht se ka një peshë të konsiderueshme për sa i përket manovrimit kushtetues dhe politik, sidomos në çështjen e presidentit, ka dështuar të ngrihet në lartësinë e duhur.

Kjo situatë, tha ambasadori, i ka dhënë mundësi Kurtit të ndërmarrë hapa që e çojnë vendin në zgjedhje, në vend të një kompromisi.

Kalimi nga kriza për zgjedhjen e presidentit në zgjedhje të përgjithshme nuk shihet nga Çejku si një zgjidhje, por si një përshkallëzim që mund të çojë në një krizë edhe më të madhe.

Ai tha se ekziston frika për një "zhvillim të paparashikuar" në lidhje me konstituimin e parlamentit të ardhshëm dhe formimin e qeverisë së re, duke rrezikuar kështu një kolaps të mëtejshëm institucional. Kriza rrezikon të zgjerojë dimensionin e saj, duke u bërë më e rëndë dhe më e vështirë për t'u menaxhuar.

Veprimet e Albin Kurtit interpretohen nga diplomati Çejku si pjesë e një kalkulimi politik afatgjatë. Pavarësisht ofertave të bëra ndaj partive opozitare, si ajo ndaj LDK-së për poste ministrore dhe zëvendëskryeministër, posti i presidentit mbeti i panegociueshëm.

Ai argumentoi se Kurti kishte të gjitha mundësitë për të arritur një zgjidhje reale duke ia lënë këtë post opozitës, por zgjodhi të mos e bënte. Ky vendim shihet nga Çejku si një strategji për të mos pranuar kompromise dhe për të konsoliduar pushtetin.

Strategjia afatgjatë e Kurtit duket se është "çimentimi" i një pushteti afatgjatë, duke e shtrirë ndikimin e tij në të gjitha strukturat shtetërore. Duke e gjetur opozitën të dobët dhe të papërgatitur, ai ka zgjedhur rrugën e përplasjes në vend të kompromisit, duke vendosur interesin partiak përpara stabilitetit të Kosovës. Ky "aksident i paralajmëruar" e çon vendin në një cikël të ri pasigurie politike.

PËR MË SHUMË NDIQNI EMISIONIN “DREJT” NË “ORA NEWS”