“AKADEMIA E AB*ZIMIT” ONLINE/ Individët ndajnë përvoja dhe metoda për të shmangur ndëshkimin
Nga OraNews Përditësimi i fundit 26 Mars 2026, 13:38
Një hetim ndërkombëtar ka zbuluar një realitet tronditës në internet, ku grupe të fshehta nxisin dhe normalizojnë dhunën seksuale ndaj grave. Përmes platformave online, individë ndajnë përvoja dhe metoda për të shmangur ndëshkimin. Rasti ka ngritur alarmin për rolin e teknologjisë në përhapjen e këtij fenomeni, teksa ekspertët kërkojnë ndërhyrje urgjente dhe përgjegjësi nga platformat digjitale.
Një hetim i gjatë ka zbuluar ekzistencën e një rrjeti të errët online, ku dhuna seksuale ndaj grave jo vetëm që promovohet, por edhe organizohet dhe normalizohet.
Përmes forumeve dhe grupeve të fshehta, përdoruesit ndajnë përvoja, këshilla dhe përmbajtje që lidhen me abuzimin, duke krijuar një lloj “komuniteti” që nxit këtë sjellje kriminale.
Rasti i njohur në Francë, ku dhjetëra burra u përfshinë në abuzime të organizuara ndaj një gruaje, nxori në pah për herë të parë këtë fenomen në shkallë të gjerë.
Megjithatë, hetimet tregojnë se aktivitete të tilla vazhdojnë në platforma të ndryshme, pavarësisht mbylljes së disa prej tyre.
Ekspertët theksojnë se algoritmet dhe përmbajtjet ekstreme në internet mund të kontribuojnë në normalizimin e dhunës, duke krijuar një ambient ku sjelljet abuzive shihen si të pranueshme.
Psikologët paralajmërojnë se brenda këtyre grupeve krijohet një ndjenjë “bashkësie”, që forcon dhe justifikon veprimet e anëtarëve.
Nga ana tjetër, viktimat shpesh përballen me vështirësi të mëdha për të denoncuar rastet, për shkak të turpit, traumës dhe mungesës së provave.
Organizatat ndërkombëtare theksojnë se mungesa e të dhënave të sakta dhe raportimi i ulët e bëjnë këtë fenomen edhe më të vështirë për t’u luftuar.
Ndërkohë, ekspertët kërkojnë masa më të forta ndaj platformave online, duke theksuar se përgjegjësia nuk duhet të mbetet vetëm tek përdoruesit.
Rasti ka ngritur shqetësime serioze për mënyrën se si teknologjia mund të përdoret për qëllime kriminale dhe për nevojën urgjente për mbrojtjen e viktimave.
