Zbulohet skema e abuzimit me çmimet e karburanteve në Shqipëri/ Tola: Si po përfitohet nga kriza
Nga Anila Zyberaj Përditësimi i fundit 18 Mars 2026, 14:37
Rritja e menjëhershme e çmimeve të karburanteve në Shqipëri duket se nuk lidhet drejtpërdrejt me zhvillimet në tregjet ndërkombëtare, por më tepër me një skemë spekulative nga operatorët e tregut. Kjo ishte një nga pikat kryesore të ngritura në studion e Ora News, ku ishte i ftuar eksperti i ekonomisë Igli Tola.
Sipas Tolës, rritja e parë e çmimeve nuk pasqyronte koston reale të furnizimit të ri me naftë, por ishte një lëvizje për të maksimizuar fitimet.
Ai shpjegon se kompanitë nuk dolën menjëherë në tregjet ndërkombëtare për të blerë karburant me çmime të rritura, por shfrytëzuan rezervat ekzistuese, të blera më herët me çmime më të ulëta.
"Kjo situatë ngre dyshime serioze për abuzim, pasi sipas legjislacionit në fuqi, kompanitë e hidrokarbureve janë të detyruara të mbajnë rezerva për disa muaj. Në këtë kontekst, rritja e menjëhershme e çmimeve sugjeron ose moszbatim të këtij detyrimi ligjor, ose një strategji të qëllimshme për të përfituar nga kriza."
Eksperti thekson se reagimi i shtetit nuk duhet të jetë sporadik, siç ndodh me ngritjen e task-forcave vetëm në momente krize. Përkundrazi, institucionet duhet të jenë në monitorim të vazhdueshëm të tregut.
Një rol kyç në këtë drejtim ka Autoriteti i Konkurrencës, i cili duhet të parandalojë marrëveshjet e mundshme për fiksimin e çmimeve apo krijimin e kartelëve mes operatorëve.
Sipas analizës, nëse institucionet do të ushtronin kontroll të përditshëm dhe efektiv, situata të tilla abuzive do të shmangeshin dhe qytetarëve do t’u garantohej një çmim më i drejtë dhe një cilësi më e mirë e produkteve.
Në përfundim, zgjidhja nuk qëndron vetëm në ndërhyrje të përkohshme, por në funksionimin e rregullt dhe transparent të tregut, duke mbrojtur konsumatorin nga spekulimet dhe abuzimet.
Ndiqni intervistën e plotë me ekspertin:
