Juventusi mendon për Lewandowski-n, kontaktet e para për sulmuesin polak
Nga OraNews Përditësimi i fundit 12 Mars 2026, 09:10
Juventusi ka nisur të planifikojë lëvizjet për sezonin 2026/27 dhe vëmendja kryesore është përqendruar te reparti i sulmit. Drejtuesit e klubit torinez po kërkojnë një “numër nëntë” të madh për të ndërtuar ofensivën e sezonit të ardhshëm, ndërsa në skenë ka dalë një emër shumë i bujshëm: Robert Lewandowski.
Sipas raportimeve nga Italia, bardhezinjtë kanë bërë një sondazh të parë me rrethin e sulmuesit polak, i cili aktualisht është pjesë e Barcelonës. Kontrata e Lewandowski-t me klubin katalanas përfundon në fund të qershorit dhe gjithçka lë të kuptohet se palët nuk do të vazhdojnë bashkëpunimin.
Në marrëveshjen aktuale ekziston një klauzolë që do të mundësonte zgjatjen automatike të kontratës edhe për një vit, por duket se drejtuesit e Barcelonës nuk kanë ndërmend ta aktivizojnë atë. Në këtë situatë, sulmuesi polak mund të largohet si lojtar i lirë, një mundësi që po tërheq interesin e disa klubeve të mëdha europiane.
Megjithëse në muajin gusht do të mbushë 38 vjeç, profili i Lewandowski-t vazhdon të konsiderohet shumë i vlefshëm në treg. Në sezonin aktual ai ka realizuar 14 gola në 34 ndeshje me Barcelonën, duke treguar se ende mund të japë kontribut të rëndësishëm në nivele të larta.
Në javët e fundit emri i tij ishte lidhur edhe me Milanin, por Juventusi duket se po monitoron situatën me kujdes për të kuptuar nëse mund të realizojë një goditje të madhe në merkato.
Nga ana e lojtarit ende nuk është marrë një vendim përfundimtar. Një opsion i mundshëm mbetet edhe kalimi në Major League Soccer, ku Lewandowski mund të përfitojë një kontratë më të majme se ajo që ka aktualisht në Evropë dhe të mbyllë karrierën në një kampionat më pak të ngarkuar.
