Pas deklaratave për familjen Beckham, Brooklyn reagon ndaj Gordon Ramsay
Nga OraNews Përditësimi i fundit 16 Shkurt 2026, 19:59
Përplasja në familjen Beckham duket se ka sjellë një tjetër krisje. Brooklyn Beckham ka hequr nga lista e ndjekësve në rrjetet sociale mikun e vjetër të familjes, Gordon Ramsay, pas komenteve të këtij të fundit për martesën e tij dhe konfliktin me prindërit.
Sipas raportimeve, Ramsay vazhdon ta ndjekë Brooklyn në Instagram, por djali i madh i David Beckham dhe Victoria Beckham ka vendosur të distancohet pas intervistës së kuzhinierit për The Sun.
Në intervistë, Gordon u shpreh se Brooklyn mund të jetë “i verbuar nga dashuria” për bashkëshorten e tij, Nicola Peltz.
“Është e vështirë, apo jo, kur je i dashuruar? Dashuria është e verbër. E thonë për një arsye,” deklaroi Ramsay, duke e quajtur situatën një “moment të vështirë”.
Ai shtoi se 26-vjeçari është “i dëshpëruar të qëndrojë në këmbët e veta”, por e këshilloi të mos harrojë prej nga vjen. “Një ditë nuk do t’i kesh më mamin dhe babain, dhe duhet ta kuptosh këtë,” u shpreh ai.
Ramsay, mik i afërt i familjes dhe i pranishëm në dasmën e Brooklyn dhe Nicola-s në Palm Beach në vitin 2022, mbrojti publikisht prindërit e tij.
“Victoria është e mërzitur, dhe me të drejtë,” tha ai, duke shtuar: “E di 24/7 sa shumë e do David Brooklyn-in.” Megjithatë, ai insistoi se marrëdhënia e tij me Brooklyn mbetet e mirë.
“Ne kemi shkëmbyer disa mesazhe. E dua – ka një zemër të jashtëzakonshme,” deklaroi Ramsay.
Sipas një burimi për Daily Mail, Brooklyn dhe Nicola “nuk duan asnjë kritikë” dhe nuk pranojnë komente negative për marrëdhënien e tyre.
Kujtojmë se në janar, Brooklyn publikoi një deklaratë të fortë në Instagram ku theksoi se nuk dëshiron pajtim me familjen.
“Nuk dua të pajtohem me familjen time. Nuk po kontrollohem, po ngrihem për veten për herë të parë në jetën time,” shkroi ai, duke akuzuar prindërit për kontroll të narrativës në media dhe për përpjekje për të dëmtuar marrëdhënien e tij me Peltz.
