Andis Sala në Athinë për vizitën e parë zyrtare/ Fokus bashkëpunimi bujqësor mes dy vendeve

Nga OraNews Përditësimi i fundit 13 Shkurt 2026, 13:14

Ministri i Bujqësisë dhe Zhvillimit Rural i Shqipëria, Andis Sala, po zhvillon vizitën e tij të parë zyrtare në Greqi, me qëllim forcimin e bashkëpunimit bujqësor mes dy vendeve.

Bëhet fjalë për vizitën e parë të një ministri me këtë portofol nga Tirana në Athinë, në një moment kur bujqësia shqiptare po hedh bazat për hyrjen në tregun e përbashkët europian, ndërsa pala greke po përpunon mësimet nga kriza e fundit në sektorin bujqësor.

Sipas vetë ministrit 38-vjeçar, vizita tre-ditore (12–14 shkurt) ka tre objektiva kryesorë:

Rritjen e volumit të shkëmbimeve tregtare dypalëshe;
Thellimin e bashkëpunimit institucional për përafrimin me politikat dhe rregulloret e BE-së;
Përfitimin e ekspertizës nga praktikat e provuara të Greqisë në zbatimin e Politikës së Përbashkët Bujqësore.
Gjatë ditës së parë në Athinë, Sala zhvilloi vizita në biznese shqiptare, takime me anëtarë të diasporës shqiptare dhe me përfaqësues të komunitetit të biznesit shqiptar në Greqi, si dhe një takim me rektorin e Universitetit Bujqësor të Athinës.

Axhenda e sotme nis me një takim dypalësh në Ministrinë greke të Zhvillimit Rural dhe Ushqimit me homologun e tij, Konstantinos Tsiaras. Më pas, ai do të zhvillojë takime në Parlamentin grek me kryetaren e Komisionit të Përhershëm të Prodhimit dhe Tregtisë, Fotini Arabatzi, si dhe në Ministrinë e Jashtme greke me zëvendësministrin Haris Theocharis, përgjegjës për diplomacinë ekonomike.

Në fokus të bisedimeve janë marrëdhëniet shqiptaro-greke dhe sfidat e përbashkëta që lidhen me ndryshimet klimatike, si thatësirat, zjarret, presioni mbi burimet ujore, sëmundjet e bimëve dhe kafshëve, si dhe nevoja për bujqësi të qëndrueshme dhe sisteme paralajmërimi të hershëm.

Vizita përmbyllet me një drekë pune me përfaqësues të sektorit bujqësor dhe agro-biznesit grek. Sipas Salës, nga Athina pritet mbështetje vendimtare për përmbylljen e negociatave me BE-në, në kapitujt që lidhen me portofolin e tij.