VD*KJE MISTERIOZE NË BULLGARI/ 6 persona gjenden të pajetë në male, hetimet përqendrohen te...
Nga Andi Kurti Përditësimi i fundit 10 Shkurt 2026, 12:45
Një seri vdekjesh misterioze në malet e Bullgarisë perëndimore ka tronditur autoritetet dhe opinionin publik. Gjashtë persona u gjetën të pajetë në dy ngjarje të ndara, ndërsa hetuesit po shqyrtojnë pistën e vetëvrasjeve apo vrasje-vetëvrasjeve. Rrethanat e paqarta dhe dëshmitë kontradiktore kanë nxitur spekulime dhe teori konspirative.
Autoritetet bullgare po hetojnë një rast të pazakontë pas zbulimit të 6 personave të pajetë në zonat malore të Bullgarisë perëndimore, një ngjarje që policia e ka cilësuar si të paprecedentë në vend.
Trupat e tre personave, mes tyre edhe një 15-vjeçar, u gjetën brenda një kamperi në zonën e majës Okolchitsa, ndërsa hetuesit besojnë se ata lidhen me një tjetër ngjarje të ndodhur një javë më parë pranë një strehe malore në Petrohan, e cila më pas u dogj.
Sipas policisë, pesë nga viktimat ishin pjesë e një organizate joqeveritare për mbrojtjen e natyrës që operonte në zonë, ndërsa i mituri ishte djali i një miku të tyre.
Pamjet e kamerave të sigurisë tregojnë se 6 personat u panë duke u përshëndetur mes tyre në ditën e ngjarjes, ndërsa tre prej tyre u filmuan më vonë duke i vënë zjarrin strehës malore.
Në vendngjarje janë gjetur dy armë zjarri, një pushkë dhe disa gëzhoja, ndërsa ekspertiza paraprake tregon se të shtënat janë kryer nga distancë e afërt.
Hetuesit kanë zbuluar gjithashtu materiale që tregojnë lidhje të disa anëtarëve të grupit me praktika të budizmit tibetian, ndërsa familjarë të njërit prej tyre kanë folur për probleme të rënda psikologjike brenda grupit.
Prokuroria deklaron se pista kryesore e hetimit mbetet ajo e vrasjeve të ndjekura nga vetëvrasje ose vetëvrasjeve të ndara, por thekson se hetimet vazhdojnë për të zbardhur plotësisht motivet dhe rrethanat e kësaj ngjarjeje të pazakontë që ka tronditur opinionin publik në Bullgari.
