“EPSTEIN”, MAXWELL HESHT NË KONGRES/ Refuzon të përgjigjet, invokon Amendamentin e Pestë kushtetues
Nga Andi Kurti Përditësimi i fundit 10 Shkurt 2026, 12:35
Xhislaine Makswell refuzoi të përgjigjej në një seancë dëgjimore të Kongresit amerikan, duke përdorur të drejtën kushtetuese për të mos dëshmuar kundër vetes. Ajo u paraqit virtualisht nga burgu në Teksas, ku po vuan një dënim 20-vjeçar për trafikim seksual. Ligjvënësit shprehën zhgënjim, pasi prisnin përgjigje për bashkëpunëtorët e mundshëm në rrjetin e Jeffrey Epstein.
E dënuara për trafikim seksual, Ghislaine Maxwell, refuzoi të përgjigjet ndaj pyetjeve të Komisionit të Mbikëqyrjes së Dhomës së Përfaqësuesve në Shtetet e Bashkuara, duke invokuar Amendamentin e Pestë të Kushtetutës amerikane, që i jep të drejtën të mos vetë-inkriminohet.
Maxwell u paraqit virtualisht në një ambient me dyer të mbyllura nga burgu në Teksas, ku po vuan një dënim 20-vjeçar për rolin e saj në rrjetin e trafikimit seksual të lidhur me financierin e ndjerë Jeffrey Epstein.
Kryetari i komisionit, republikani James Comer, deklaroi se refuzimi për të dëshmuar ishte i pritshëm, por zhgënjyes, pasi ligjvënësit kishin shumë pyetje për krimet e kryera dhe për bashkëpunëtorët e mundshëm të përfshirë në rrjet. Ai theksoi se hetimi synon të zbardhë të vërtetën dhe të sigurojë drejtësi për viktimat.
Nga ana tjetër, avokatët e Maxwell kanë deklaruar se ajo do të ishte e gatshme të fliste plotësisht nëse do t’i jepej falje presidenciale, ndërsa Shtëpia e Bardhë ka theksuar se nuk po shqyrtohet asnjë lloj lehtësimi për të.
Një grup viktimash të Epstein u ka kërkuar ligjvënësve të jenë skeptikë ndaj çdo dëshmie të saj, duke argumentuar se ajo më parë ka refuzuar të bashkëpunojë me hetimet dhe nuk ka identifikuar personat e fuqishëm të përfshirë në rrjet.
Seanca dëgjimore zhvillohet në një moment kur Departamenti amerikan i Drejtësisë ka publikuar miliona faqe dokumentesh të reja nga hetimet për Epstein, ndërsa anëtarët e Kongresit do të kenë akses edhe në versionet e paredaktuara të materialeve, me synimin për të zbardhur plotësisht dimensionet e çështjes.
