Kina: Vizat për tajvanezët, vijë e kuqe! Pekini: Ligjet e BE-së lejojnë refuzimin e hyrjes për shtetas jashtë unionit

Nga Katerina Hysenllari Përditësimi i fundit 13 Janar 2026, 17:16

Kina po ushtron presion ndaj vendeve evropiane që të mos u japin viza politikanëve tajvanezë, duke argumentuar se ligjet e BE-së lejojnë refuzimin e hyrjes për të mbrojtur marrëdhëniet me Pekinin. Vendet evropiane kanë reaguar me kujdes, duke theksuar se politikat e vizave përcaktohen nga ligjet e tyre kombëtare dhe rregullat e zonës Shengen.

Zyrtarët kinezë kanë ushtruar presion ndaj disa vendeve evropiane që të mos u japin viza politikanëve tajvanezë, duke paralajmëruar se lejimi i tyre do të përbënte shkelje të asaj që Kina e quan “vija e kuqe” në marrëdhëniet me Pekinin.

Sipas më shumë se gjashtë burimeve diplomatike The Guardian shkruan se Kina ka dërguar “këshilla ligjore” në ambasadat evropiane në Pekin dhe drejtpërdrejt në qeveritë kombëtare gjatë muajve nëntor dhe dhjetor.

Këto ndërhyrje lidhen me vizitat e fundit në Evropë të zyrtarëve të lartë tajvanezë, përfshirë zëvendëspresidenten aktuale, ministrin e jashtëm dhe një ish-president të Tajvanit.

Në nota zyrtare diplomatike, Pekini ka argumentuar se ligjet e BE-së për kufijtë, përfshirë Kodin e Kufijve Shengen, lejojnë refuzimin e hyrjes për shtetas jashtë BE nëse ata konsiderohen rrezik për marrëdhëniet ndërkombëtare të një shteti anëtar.

Ekspertët evropianë e kanë cilësuar këtë interpretim si të guximshëm dhe të pabazuar ligjërisht.

Në disa raste, Kina ka përmendur edhe Konventën e Vjenës për Marrëdhëniet Diplomatike dhe ka sugjeruar që vendet evropiane të ndjekin shembullin e OKB-së duke mos lejuar zyrtarë tajvanezë në ndërtesa qeveritare. Gjithashtu, Pekini ka kërkuar që vendet evropiane të mos njohin pasaportat diplomatike të lëshuara nga Tajvani.

Ministritë e jashtme të Norvegjisë dhe Finlandës konfirmuan se i kanë marrë këto komunikime, duke theksuar se politikat e vizave për Tajvanin përcaktohen nga autoritetet përkatëse të zonës Shengen.

Mbretëria e Bashkuar deklaroi se hyrja në vend vendoset vetëm sipas ligjeve dhe rregullave të saj kombëtare.