Kostyuk refuzon përsëri ta përshëndesë Sabalenkën: Në Ukrainë është -20 gradë dhe ka mijëra njerëz pa energji elektrike

Nga OraNews Përditësimi i fundit 11 Janar 2026, 15:56

Ukrainasja Marta Kostyuk, e cila humbi ndaj bjelloruses Aryna Sabalenka në finalen e Brisbane WTA 500 të dielën, nuk i ka shtrënguar duart lojtareve ruse ose bjelloruse që nga pushtimi i vendit të saj në vitin 2022. 

Ajo e ka shpjeguar në raste të mëparshme se qëndrimi i saj nuk është personal kundër lojtareve, por më tepër një formë proteste kundër pushtimit të vendit të saj. 

Në fakt, numri një në botë e ka shprehur publikisht kundërshtimin e saj ndaj luftës në disa raste. "Askush në këtë botë, atletët rusë apo bjellorusë, nuk e mbështesin luftën. Askush. Si mund ta mbështesim ne atë?

Njerëzit e zakonshëm nuk e bëjnë. Nëse do të mund ta ndalonim, do ta bënim, por për fat të keq nuk është në duart tona", u shpreh Sabalenka në një konferencë për shtyp gjatë French Open 2023, duke e bërë shumë të qartë qëndrimin e saj.  

Aryna Sabalenka, gjatë fjalimit të saj si kampione e turneut WTA 500 Brisbane.

Lojtares bjelloruse i është refuzuar një shtrëngim duarsh në rrjetë në disa turne. Në fakt, i njëjti gjest tre vjet më parë në Roland Garros shkaktoi fishkëllima nga turma.

Këtë të diel në Brisbane të Australisë, askush nuk u habit që ajo refuzoi t'i shtrëngonte dorën Sabalenkës në finale. Në fakt, për të shmangur tensionet, organizatorët u shpjeguan të dyja lojtareve se nuk do të kishte foto në grup të finalistëve me trofetë e tyre në fund të ceremonisë së ndarjes së çmimeve. 

Por, pasi mori trofeun e saj të dytë, Kostyuk shfrytëzoi rastin për t'i kujtuar botës situatën në vendin e saj. "Dua të them disa fjalë për Ukrainën. Luaj çdo ditë me zemër të rëndë. Ka mijëra njerëz që tani nuk kanë energji elektrike ose ujë të ngrohtë. Jashtë është -20 gradë Celsius.

Është shumë e dhimbshme të jetosh këtë realitet çdo ditë. Motra ime fle nën tre batanije, sepse është shumë ftohtë në shtëpi. U preka shumë dhe u gëzova që pashë kaq shumë flamuj ukrainas këtë javë", tha ajo.

Nga ana e saj, Sabalenka e nisi fjalimin e saj të fitores duke i kushtuar disa fjalë të mira kundërshtares së saj. "Para së gjithash, dua ta përgëzoj Martën dhe ekipin e saj për këtë fillim të jashtëzakonshëm të sezonit. Ju uroj gjithë të mirat. Shpresoj të takohemi përsëri shumë herë të tjera në finale për të luajtur tenis të shkëlqyer", tha ajo.

Kostyu nuk është e vetmja tenisiste ukrainas që refuzon t’i shtrëngojë duart lojtareve ruse dhe bjelloruse. Lesia Tsurenko gjithashtu refuzoi t’i shtrëngojë dorën Sabalenkës në Australian Open 2024.

Elina Svitolina gjithashtu refuzon shtrëngimin tradicional të duarve nga respekti për ushtarët ukrainas dhe si një mënyrë për ta mbajtur mesazhin për luftën të dukshëm në qarkun profesional.