Në karrocë me rrota drejt hapësirës/ Inxhinierja 33-vjeçare bëhet personi i parë me aftësi të veçanta që udhëton drejt hapësirës
Nga OraNews Përditësimi i fundit 21 Dhjetor 2025, 09:01
Një moment historik për përfshirjen dhe eksplorimin hapësinor është shënuar këtë fundjavë në SHBA. Michaela Benthaus, një inxhiniere 33-vjeçare me origjinë nga Gjermania, është bërë personi i parë që udhëton drejt kufirit të hapësirës duke përdorur karrocë.
Fluturimi u realizua me anijen New Shepard të kompanisë Blue Origin, e cila u nis nga Teksasi dhe zgjati rreth 10 minuta. Anija arriti mbi 65 milje lartësi, deri në vijën Kármán, e konsideruar kufiri i hapësirës.
Gjatë udhëtimit, Benthaus përjetoi momente pa peshë dhe, siç rrëfeu më pas, “qeshi gjatë gjithë kohës”.
Michaela Benthaus mbeti e paralizuar nga këmbët pas një aksidenti të rëndë me biçikletë malore shtatë vite më parë, që i dëmtoi palcën kurrizore.
Pavarësisht kësaj, ajo vijoi karrierën shkencore dhe u përfshi në programin e trajnimit të Agjencisë Hapësinore Evropiane, duke marrë pjesë edhe në misione të simuluara hapësinore.
Sipas Blue Origin, nevojitën vetëm përshtatje minimale për ta bërë fluturimin të aksesueshëm, duke treguar se hapësira mund të jetë e hapur për më shumë njerëz sesa më parë. Pas uljes, Benthaus u ndihmua të dilte nga kapsula, mes duartrokitjeve të ekuipazhit.
“Mos hiqni dorë kurrë nga ëndrrat tuaja,” tha ajo, duke dhënë një mesazh frymëzues që tashmë ka kaluar kufijtë e Tokës.
