Kupa Interkontinentale/ PSG për historinë, Flamengo për rikthimin, në lojë trofeu i fundit ndërkombëtar i vitit

Nga OraNews Përditësimi i fundit 17 Dhjetor 2025, 16:58

Sot, në Qatar, Paris Saint-Germain dhe Flamengo përballen në finalen e Kupës Interkontinentale, duke luajtur për trofeun e fundit ndërkombëtar të vitit. Parisienët, kampionë të Champions League, synojnë të shtojnë një tjetër trofe pas një sezoni të suksesshëm, i vetëm “njollosur” nga humbja ndaj Chelseat në finalen e Botërorit të Klubeve. Flamengo, fitues i Copa Libertadores, kërkon të përsërisë suksesin historik, pas triumfit të vitit 1981.

Ndeshja zhvillohet në ‘Ahmed bin Ali Stadium’, në Al Rayyan. Brazilianët kanë kaluar më parë përballë Cruz Azul dhe Pyramids për të arritur finalen, ndërsa PSG ka përfituar akses direkt si kampion i Evropës.

Në radhët e Flamengos do të jenë disa emra të njohur nga Serie A: Jorginho, Alex Sandro dhe Danilo, me ish-kapitenin e Juventusit që tregon dashurinë për klubin e tij të mëparshëm: “Juve ishte dashuria ime e madhe, herë pas here dërgoj mesazhe për djemtë dhe shpresoj që me Spallettin të arrijnë objektivat e tyre”. Ai shtoi: “PSG është një skuadër e fortë, ne duhet të përgatitemi mirë dhe ndoshta mund t’i mposhtim. Shpresojmë të sjellim një tjetër kupë në Rio”.

Trajneri i PSG-së, Luis Enrique, theksoi rëndësinë e finales:

“Jemi të vetëdijshëm për rëndësinë e kësaj ndeshjeje dhe kemi bërë gjithçka për të arritur këtu. Ky moment është vazhdimësi e asaj që përjetuam sezonin e kaluar. Është koha për të luajtur finalen, e rëndësishme për skuadrën, klubin dhe tifozët tanë. Jemi të lumtur për këtë mundësi”.

Formacionet e mundshme:

PSG (4-3-3): Chevalier; Zaire-Emery, Pacho, Marquinhos, Mendes; Fabian Ruiz, Vitinha, Neves; Kvaratskhelia, Doué, Barcola

Flamengo (4-2-3-1): Rossi; Varela, Danilo, Leo Pereira, Alex Sandro; Pulgar, Jorginho; Carrascal, de Arrascaeta, Everton; Bruno Henrique

Nëse PSG fiton, do të jetë skuadra e parë franceze që ngre lart Kupën Interkontinentale, ndërsa Flamengo synon një rikthim të madh në histori.

Kupa Interkontinentale/ PSG për historinë, Flamengo për