DEBAT PËR EDUKIMIN NË SHKOLLA/ Polemika në Itali për ligjin e ri që synon frenimin e “ideologjisë gjinore”

Nga Andi Kurti Përditësimi i fundit 5 Dhjetor 2025, 14:21

Një projektligj i mbështetur nga qeveria e ekstremit të djathtë të Giorgia Melonit ka shkaktuar reagime të forta në Itali, pasi kufizon edukimin seksual në shkolla dhe synon të godasë atë që ministrat e kabinetit e quajnë “ideologji gjinore” dhe “bllok progresist”.

Italia po përballet me një debat të ashpër politik dhe shoqëror pas miratimit në Dhomën e Ulët të një projektligji që vendos kufizime të reja për edukimin seksual në shkolla.

Sipas nismës, edukimi seksual do të lejohet në shkollat e mesme të ulëta (mosha 11–14 vjeç) vetëm me pëlqim të shkruar nga prindërit, ndërsa ndalohet plotësisht në shkollat fillore. Ligji duhet të marrë miratimin e Senatit për t’u bërë efektiv.

Opozita zhvilloi protesta jashtë parlamentit, duke e cilësuar projektligjin si regresiv dhe të dëmshëm për përpjekjet kundër dhunës ndaj grave dhe femicidit.

Italia mbetet ndër vendet e pakta të BE-së pa edukim seksual të detyrueshëm, pavarësisht studimeve që tregojnë se programet gjithëpërfshirëse ndihmojnë në parandalimin e dhunës dhe abuzimit.

Qeveria e Melonit argumenton se nisma mbron vlerat tradicionale familjare dhe parandalon përhapjen e “ideologjisë gjinore”.

Zëvendësministri i arsimit, Rossano Sasso, deklaroi se ligji synon të ndalojë aktivistët politikë të bëjnë propagandë në shkolla dhe të parandalojë që “drag queens dhe aktorët porno të futen në klasa” për të folur për “fluiditetin gjinor” apo “mëmësinë surrogate”.

Sasso e përfundoi fjalën në parlament duke përsëritur sloganin fashist “Perëndia, Atdheu dhe Familja”, duke e quajtur atë udhërrëfyes të politikave të qeverisë.

Aktivistët dhe pedagogët kanë paralajmëruar se projektligji vendos barriera të panevojshme për shkollat që duan të zbatojnë programe të edukimit seksual, ndërsa Sara Ferrari nga Partia Demokratike tha se ai pengon një “instrument jetik për luftën kundër dhunës ndaj grave”.

Megjithëse 34 përpjekje ligjore për ta bërë edukimin seksual të detyrueshëm kanë dështuar që nga viti 1975 në Itali, sondazhet e fundit tregojnë mbështetje të madhe publike: 90% e nxënësve dhe 80% e prindërve e mbështesin futjen e programeve të tilla.