MOTI EKSTREM NË ITALI/ Shkollat dhe parqet mbyllen, trafiku paralizohet, shkaktohen dëme të shumta
Nga Lili Saraçi Përditësimi i fundit 4 Dhjetor 2025, 14:40
Italia jugore po përballet me stuhi të forta dhe reshje të dendura, duke detyruar mbylljen e shkollave dhe ndërprerje të trafikut në disa rajone. Autoritetet kanë lëshuar alarme portokalli dhe kanë urdhëruar mbylljen e parqeve dhe shkollave për të garantuar sigurinë.
Në pjesën jugore të Italisë, moti i keq ka shkaktuar ndërprerje të mëdha në qarkullimin e qyteteve dhe bllokime të trafikut, ndërsa shkollat dhe institucionet arsimore janë mbyllur për të garantuar sigurinë e nxënësve.
Në rajonin e Basilikatës, katër bashki të zonës kanë urdhëruar ndërprerjen e mësimit për shkak të reshjeve të dendura dhe përmbytjeve në disa nënkalime.
Situata është e ngjashme edhe në Puglia dhe Kalabri, ku alarmi portokalli paralajmëron qytetarët për rreziqe të mëdha nga era dhe shiu.
Zjarrfikësit dhe ekipet e emergjencës kanë ndërhyrë për dhjetëra raste, duke përfshirë rrëzime pemësh, shembje shtyllash telefonike dhe ndërprerje të energjisë elektrike.
Në Bari, një pjesë e veprës artistike e Edoardo Tresoldit në Sheshin e Shën Pjetrit u shemb nga stuhia, ndërsa nuk raportohet për të lënduar.
Autoritetet lokale kërkojnë nga qytetarët të shmangin nënkalimet, urat dhe argjinaturat, duke respektuar masat e emergjencës.
Meteorologët paralajmërojnë se moti i keq do të vazhdojë edhe në orët e ardhshme, me reshje të dendura dhe erëra të forta, ndërsa ekipet e emergjencës mbeten në gatishmëri për të parandaluar dëme të mëtejshme dhe për të garantuar sigurinë e qytetarëve.
