Grabitje e armatosur në autostradën Suharekë-Malishevë
Nga OraNews Përditësimi i fundit 25 Tetor 2025, 18:07
Një ngjarje e rëndë ka ndodhur në orët e mëngjesit të së premtes në autostradën Suharek-Malishevë, ku menaxheri i një poste private është bërë shënjestër e një grabitjeje të armatosur.
Sipas raportit zyrtar të Policisë së Kosovës, viktima, një mashkull kosovar, ka deklaruar se, gjatë drejtimit të automjetit të tij, një veturë pa targa i është afruar dhe një person nga ajo veturë ka shtënë disa herë me armë zjarri, duke goditur automjetin.
Si pasojë e të shtënave, viktima është detyruar të ndalet, moment në të cilin nga automjeti i dyshuar kanë dalë dy persona të maskuar.
Ata e kanë kërcënuar dhe më pas i kanë grabitur një shumë të konsiderueshme parash, që sipas viktimës ishin para të përfituara nga aktiviteti i postës.
Në vendngjarje kanë mbërritur menjëherë njësitë policore relevante, përfshirë hetuesit dhe ekspertët e forenzikës, të cilët po punojnë për identifikimin e autorëve dhe sqarimin e plotë të rrethanave të rastit.
Fatmirësisht, nuk raportohet për persona të lënduar.
