Dalin PAMJET/ Deputeti i LDK-së Armend Zemaj godet me grusht një qytetar (VIDEO)
Nga OraNews Përditësimi i fundit 24 Tetor 2025, 21:54
Deputeti i Kuvendit të Kosovës nga radhët e LDK-së, Armend Zemaj, është përfshirë në një përplasje fizike me një qytetar në qendër të Prishtinës.
Incidenti ndodhi këtë të premte kur deputeti po jepte një intervistë për “Gazeta Blic” në sheshin “Ibrahim Rugova” në kryeqytet.
Për ngjarjen është lajmëruar policia që ka shoqëruar të dyja palët për të dhënë sqarime. Më pas deputeti Zemaj reagoi në rrjetet sociale duke kërkuar ndjesë për incidentin, por tha se “mbrojti dinjitetin e tij”.
“Sot gjatë një interviste publike ndodhi një situatë e pakëndshme, për të cilën ndjej keqardhje të sinqertë.
Një qytetar, nuk e di a ishte e rastit apo me qellim te caktuar, këtë do e vërtetojnë policia, më ofendoi dhe më provokoi verbalisht me fjalë të papranueshme, para medias dhe gazetarit që ishim në intervistë.
Në atë moment reagova në mënyrë të vetëmbrojtjes në afekt, gjë e cila nuk përfaqëson as bindjet e mia personale, as parimet që unë përfaqësoj si deputet dhe si anëtar i Lidhjes Demokratike të Kosovës.
Në këto raste sulmi dhe fyerjesh të ulëta, sigurisht do duhej të ruaja qetësinë dhe dinjitetin në çdo rrethanë dhe pavarësisht provokimit, i cili nuk me ka ndodhë kurrë gjatë karrierës sime, dhuna, në çfarëdo forme, nuk është përgjigje e drejtë.
Për këtë veprim, shpreh keqardhje dhe kërkoj falje publike.
Kam respekt të plotë për çdo person, për çdo mendim dhe çdo kritikë, pavarësisht se sa e ashpër mund të jetë ajo, e imja është te mos reagoj me emocione.
Andaj duhet të më shërbejë si mësim për të qenë më i durueshëm dhe më i përmbajtur në çdo situatë. Faleminderit të gjithëve për mirëkuptimin”, shkruan Zemaj në Facebook.
